سوودانی و میری قەتەڕ گۆڕانكارییەكانی ناوچەكە تاوتوێ دەكەن

ئاڤا نیوز

 

سەرۆكوەزیرانی عێراق و میری قەتەر گۆڕانكارییەكانی ناوچەكە و قۆناغی سووریای دوای بەشار ئەسەد بە تەلەفۆن تاوتوێ دەكەن.

 

ڕاگەیێنراوی فەرمی: نووسینگەی ڕاگەیاندنی سەرۆكوەزیرانی عێراق لە ڕاگەیێنراوێكدا ئەوەی خستەڕوو، محەممەد شیاع سوودانی، سەرۆكوەزیرانی عێراق، لەگەڵ تەمیم بن حەمەد ئال سانی، لە پەیوەندییەكی تەلەفۆنی، بۆچوونەكانیان لەبارەی گۆڕانكارییەكانی ناوچەكە و ئاڵنگارییەكانی بەردەم پرۆسەی سیاسی و سەقامگیریی ڕۆژهەڵاتی ناوەڕاست ئاڵوگۆڕ كردووە.

 

سوودانی لەو پەیوەندییە تەلەفۆنیەکەدا جەختی لە پێویستی ڕێزگرتن لە خواستی خەڵكی سووریا كردووەتەوە و بە میری قەتەری وتووە "پێویستە ڕێز لە سەروەریی سووریا بگیرێت و بژاردە بخرێتە بەردەم گەلی سووریا بۆ دیاریكردنی ئاییندەی خۆیان".

سوودانی ئاماژەی بەوەشكردووە، عێراق هەموو هەوڵێك دەدات گرژییەكانی سووریا نەگوازرێتەوە نێو وڵاتانی دراوسێی.

لەلایەکی دیکەوە: میری قەتەڕ جەختی لە گرنگی گفتوگۆ و ڕەتكردنەوەی زمانی شەڕ و لێك تێنەگەیشتن كردووەتەوە لە دیاریكردنی ئاییندەی سووریا.