ئیسرائیل لەلایەن تورکیا بە داگیرکردنی خاکی سووریا تۆمەتبار دەکرێت

ئاڤا نیوز

 

وەزارەتی دەرەوەی تورکیا، ئیسرائیل بە پێشلکاری بەرامبەر ڕێککەوتنی جیاکردنەوەی خاکی سووریا و ئیسرائیل تۆمەتبار دەکات و پاڵپشتی وڵاتەکەی بۆ یەک پارچەی خاکی سووریا نوێ دووپات دەکاتەوە.

 

وێنە گەورەکە: هاوکات لەگەڵ هێرشی گرووپە چەکدارەکانی ئۆپۆزیسیۆنی سووریا بۆ سەر سەر چەندین ناوچەی سووریا، ئیسرائیل دەستی کردووە بە بۆردومانی کۆگاکانی چەک و تەقەمەنی و ناوەندە سەربازییەکانی دیمەشق و چەندین شاری تر، هەر ئەوەندەش نییە بەڵکو تانک و زرێپۆشەکانیشی بەرەو سنوورەکان جوڵە پێکردووە و بەرزاییەکانی جۆلانیشی داگیر کردووە.

 

ڕاگەیێنراوی فەرمی: وەزارەتی دەرەوەی تورکیا لەو بارەیەوە دەڵێت؛ ئیسرائیل عەقڵیەتی داگیرکەری خۆی لە سووریا نیشان دەدات، خەڵکی ئەو ولاتە چەندین ساڵە لە حەسەرەتی ئازادی و ئاسایش ماونەتەوە، لەم دۆخە هەستیارەدا ئەو وڵاتە دەیەوێت هەژموونی خۆی زاڵ بکات.
 

ئەوەی پێویستە بیزانیت: دوای ڕووخانی دەسەڵاتی ئەسەد لەلایەن گرووپە چەکدارەکانی ئۆپۆزیسیۆن، ئەو وڵاتە چووەتە قۆناغی بوونیادنانی سووریایەکی نوێ، تورکیا چاوی لەسەر پێشهاتەکانە و نایەوێت ئەوانەی کە بە دوژمنی خۆی دەزانێت ڕۆڵیان هەبێت لە حکومەتی  نوێ دا.

 

 قووڵتر: ئیسرائیل ترسی لە بەهێزبوونی گرووپە چەکدارەکانی سەر بە ئێرانە لە سووریا، بەوەی ئەو لە شەڕی حەماس و لە ئاگربەستی حیزبوڵڵادایە، نایەوێت بەرەیەکی دیکەی بۆ دروست ببێت، ئەوەش ڕوونە کە تورکیا ڕۆڵی سەرەکی لە پەرەسندنەکانی سووریا هەیە و پشتیووانی حەماس و دوژمنی ئیسرائیلە، ئەم دۆخە بۆ ئیسرائیل مەترسیدارتر دەبێت، هەر بۆیە دەیەوێت ڕێکارەکانی خۆپارێزی پێشوەختە بگرێتە بەر.