بەرگریی شارستانیی سووریا بۆ ئاڤا: دەیان هەزار زیندانیکراو بێسەروشوێنن

ئاڤا نیوز

 

دوای ڕووخانی دەسەڵاتەکەی بەشار ئەسەد گەڕان بۆ ئاشکراکردنی ئەو هەزاران زیندانیکراوە بەردەوامە کە لە چەند دەیەی ڕابردوودا دەستگیرکرابوون، بەرگریی شارستانی ئەو وڵاتەش دەڵێت، دەیان هەزار زیندانیکراو بێسەروشوێنن و لەهیچ شوێنێک بۆیان نادۆزرێتەوە.

 

ئەوەی پێویستە بیزانیت: زیندانی سیدنایا لە سووریا بە یەکێک لە زیندانە هەرە مەترسیدارەکانی دەسەڵاتی ئەسەد دەناسرا، دەیان هەزار کەسی تێدا زیندانیکراوە و لە سێدارەدراون، دوای چەند ڕۆێکیش گەڕان تەنیا سەدان کەس دۆزراونەتەوە و ڕزگارکراون.

 

لێدوانی فەرمی: ئەحمەد یازجی، ئەندامی کارگێڕی بەرگریی شارستانیی سووریا بە ئاڤا نیوزی ڕاگەیاند، "دەیان هەزار زیندانیکراو لە زیندانەکانی ڕژێمی ئەسەد بێ سەروشوێنن و تائێستا چارەنووسیان نادیارە، نازانین ئەوانە هەموویان لەناوبراون یان بۆ شوێنی دیکە گوازراونەتەوە".

 

بەوتەی ئەو ئەندامەی بەرگریی شارستانیی سووریا، زیاتر ئەوانەی لە زیندانی سیدنایا بوون چارەنووسیان نادیارە، لە گەڕانیشدا بەناو زیندانەکەدا دەرکەوتووە کە هیچ شوێنێکی نهێنی لەناو زیندانەکەدا بوونی نەبووە.

 

باکگراوند: ڕۆژی 8-12-2024 چەکدارانی ئۆپۆزیسیۆنی سووریا چوونە ناو دیمەشق  و کۆتاییان بە دەسەڵاتی ئەسەد هێنا، دوای ئەوە بە هەزاران زیندانی لە گرتووخانەکانی ئەسەد ئازادکران.