کۆتایی بە ئەرکەکانی 'یۆنامی' لە عێراق دەهێنرێت

ئاڤا نیوز

 

وەزارەتی دەرەوەی عێراق دەڵێت، لە ماوەی داهاتوودا چەندین کۆبوونەوە لە بەغدا و نیویۆرک ئەنجام دەدرێن و تیایاندا ڕێکارەکانی کۆتاییهێنان بە نوێنەرایەتی نەتەوەیەکگرتووەکان بۆ عێراق (یۆنامی) دیاری دەکرێن.

 

ئەوەی پێویستە بیزانیت: یونامی نێردەیەکی سیاسیە، لە ساڵی 2003 لەسەر داوای عێراق بە بڕیاری ئەنجوومەنی ئاسایشی نێودەوڵەتی دامەزراوە، کاری یارمەتیدان و ڕاوێژکاری بۆ حکومەتی عێراق ئەنجام دەدات، بە بڕیاری ئەنجوومەنی ئاسایش لە کانوونی یەکەمی 2025 کۆتایی بە ئەرکەکانی یونامی لە عێراق دەهێنرێت.

 

ڕاگەیێنراوی فەرمی: وەزارەتی دەرەوەی عێراق بڵاویکردەوە، فوئاد حوسێن، جێگری سەرۆکوەزیران و وەزیری دەرەوە لەگەڵ محەممەد ئەلحەسان، نوێنەری سکرتێری گشتی نەتەوەیەکگرتووەکان لە عێراق کۆبووەتەوە، لە کۆبوونەوەکەشدا هەردوولا جەختیان لە پاراستنی ئارامیی و ئاسایشی ناوچەکە کردووەتەوە.

 

زانیاریی زیاتر: لە کۆبوونەوەکەدا باس لە کۆتاییهێنان بە کاری نوێنەرایەتیی نەتەوەیەکگرتووەکان لە عێراق کراوە، بڕیارە لە قۆناغی داهاتووشدا لە بەغدا و نیویۆرک چەند کۆبوونەوەیەک ئەنجام بدرێن تا بەشێوەیەکی فەرمیی و ڕێکوپێک ڕێکارەکانی کۆتاییهێنان بە ئەرکی نێردەی یۆنامی بۆ عێراق دیاری بکرێن.