ئەنجوومەنی وەزیرانی عێراق و هەرێمی کوردستان لەبارەی پرسی مووچە کۆدەبنەوە

ئاڤا نیوز 

 

ئەنجوومەنی وەزیرانی هەرێمی کوردستان و ئەنجوومەنی وەزیرانی عێراق بە جیا کۆدەبنەوە و پرسی مووچە تاوتوێ دەکەن و بڕیار لەسەر سێ مووچەی کۆتایی ئەمساڵی مووچەخۆرانی هەرێمی کوردستان دەدرێت کە چارەسەریان کردووە.

 

وێنە گەورەکە: لە ماوەی دوو هەفتەی ڕابردوو بەغدا بڕی 761 ملیار دیناری بۆ پڕکردنەوەی ئەو کورتهێنانەی لە مووچەی مانگەکانی 10 و 11 خستەسەر هەژماری وەزارەتی دارایی کوردستان. ئەمەش دوای هەوڵەکانی سەرۆکوەزیران مەسرور بارزانی لەگەڵ سەرۆکوەزیرانی عێراق محەممەد شیاع سوودانی .

 

زانیاریی بەدەستهاتوو:  کۆبوونەوەی ئەمڕۆی ئەنجوومەنی وەزیرانی کوردستان چوار تەوەر تاوتوێ دەکات، ئەوانیش: 

یەکەم: دوایین پێشهاتەکانی مووچەی مووچەخۆرانی هەرێمی کوردستان، هەموارکردنەوەی یاسای بودجەی گشتیی فیدڕاڵ و خشتەکانی هاوپێچی یاساکە بۆ ساڵی دارایی 2025.

دووەم: خستنەڕووی پێشنیاری هاوتاکردنی ناونیشانی وەزیفی فەرمانبەرانی هەرێمی کوردستان لەگەڵ حکومەتی فیدڕاڵی، کە ژمارەیەک ناونیشانی وەزیفی نوێ تۆمارکراون و هەندێکی دیکە هەڵوەشێنراونەتەوە.

سێیەم: خستنەڕووی ڕاپۆرتێک لەبارەی دۆخی پێکهاتەکان لەلایەن وەزیری هەرێم بۆ کاروباری پێکهاتەکان.

چوارەم: تاوتوێکردنی دوایین پێشهات و ڕووداوەکانی ئەم دواییەی سووریا.

لەلایەکی دیکەوە: ئاڤا زانیویەتی لە کۆبوونەوەی ئەنجوومەنی وەزیرانی عێراق کە بڕیارە دوا نیوەڕۆی ئەمڕۆ بەڕێوەبچێت، باسی چارەسەرکردنی کێشەی مووچە و پڕکردنەوەی کورتهێنان دەکرێت.