عێراق و ئەمریکا جەخت لە پتەوکردنی پەیوەندییه دووقۆڵییەکانی نێوانیان دەکەنەوە

ئاڤا نیوز

عێراق و ئەمریکا جەخت لە گرنگی بەهێزکردنی گفتوگۆی بەردەوامی نێوانیان دەکەنەوە بە شێوەیەک کە خزمەت بە بەرژەوەندی گەلانی هەردوو وڵات بکات و بەشداربێت لە گەیشتن بە ئاشتی و سەقامگیری لە ناوچەی ڕۆژهەڵاتی ناوەڕاستدا.

 

چیرۆکی سەرەکی: ڕۆژی چوارشەممە 11-12-2024، مەحموود مەشهەدانی، سەرۆکی ئەنجوومەنی نوێنەرانی عێراق پێشوازی لە جۆن باس، بریکاری وەزیری دەرەوەی ئەمریکا بۆ کاروباری سیاسی و کارگێڕی و خاتوو باربارا لیف، یاریدەدەری وەزیری دەرەوەی ئەمریکا بۆ کاروباری ڕۆژهەڵاتی ناوەڕاست کرد.

 

وێنە گەورەکە: ئاڵۆزییەکانی سووریا بەردەوامییان هەیە، جیهان و ناوچەکە چاوی لەسەر دوایین پێشهاتەکانی سووریایە، لەسەرووی هەموویانەوە ئەمریکا بە وردی چاودێری بارودۆخەکە دەکات لەگەڵ وڵاتانی ناوچەکە لە پەیوەندی بەردەوامدایە.

 

ڕاگەیێنراوی فەرمی: نووسینگەی مەشهەدانی ڕایگەیاند:

• له کۆبوونەوەکەدا چۆنیەتی پتەوکردنی پەیوەندییه دووقۆڵییەکانی نێوان عێراق و ئەمریکا لەبوارە جیاجیاکانی سیاسی و ئەمنی و ئابووریدا تاوتوێکران.

 

•  پێداچوونەوە بە دوایین پێشهاتەکانی دۆخی ناوچەکە لە سووریا و پێشهاتەکانی ناوچەی ڕۆژهەڵاتی ناوەڕاست بە گشتی کرا.

 

• پێویستی بەردەوامی هەماهەنگی و هاوکاری نێوان عێراق و ئەمریکا بۆ ڕووبەڕووبوونەوەی ئاستەنگە ئەمنی و ئابوورییەکان کە هەڕەشە لە سەقامگیری ناوچەکە دەکەن جەختی لەسەر کرایەوە.

 

بۆچوونی لایەنی بەرامبەر: لە کۆبوونەوەکەدا جۆن باس جەختی لە پابەندبوونی ئەمریکا کردەوە بۆ پتەوکردنی هاوبەشی ستراتیژی لەگەڵ عێراق و پاڵپشتیکردنی لە بوارەکانی بەرەنگاربوونەوەی تیرۆر و گەیشتن بە گەشەپێدانی ئەمنی و بەردەوام، هەروەها ستایشی ئەو پێشکەوتنانەی کرد کە حکومەتی عێراق لەو بوارەدا بەدەستیهێناوە لە چاکسازییە سیاسی و ئابوورییەکان.