سەرۆک ئەرکانی سوپای عێراق: ڕێگە بە هیچ هەڕەشەیەک نادەین

ئاڤا نیوز

بە مەبەستی هەڵسەنگاندنی دۆخی ئەمنی لە دەروازەی سنووریی قائیم لەگەڵ سووریا، سەرۆک ئەرکانی سوپای عێراق سەردانی قەزای قائیمی کرد و ڕەتیکردەوە تاوەکو ئێستا هیچ پێکدادانێک لەنێوان هێزەکانیان و ئەو هێزانە هەبێت کە لەودیو سنووری سووریا هەن.

 

وێنە گەورەکە: پەرسەندنەکانی سووریا و لێکەوتەکانی لەسەر عێراق ناوچەکە وای لە حکومەتی عێراق کردووە ڕێوشوێنی پێویست لەسەر سنوورەکانی لەگەڵ سووریا بگرێتە بەر، بۆ ئەوەی پریشکی ئەو ئاگرەی لە سووریا هەیە، نەگوازرێتەوە بۆ وڵاتەکەی.

 

ڕاگەیێنراوی فەرمی: عەبدولئەمیر ڕەشید یاروڵڵا، سەرۆک ئەرکانی سوپای عێراق بۆ بەسەر کردنەوەی کەرتە سەربازییەکان سەدانی قەزای قائیمی هاوسنوور لەگەڵ سووریا کرد.

 

. دۆخی سوریا ناسەقامگیرە و ڕێگە نادەین هیچ هەڕەشەیەک بۆ سەر سنوورەکانمان دروست ببێت، سنووری عێراقیش بە تەواوەتی پارێزراوە.

 

. عێراق بە هێڵێکی بەرگری لە سوپا و هێزەکانی حەشدی شەعبی سنوورەکانی بەهێزکردووە، سنوورەکانمان لەگەڵ سووریا مەترسیدارترینن و پێش ڕووداوەکانی ئەم دواییە پارێزراو بوون.

 

. تا ئێستا هیچ پێکدادانێک لەنێوان هێزەکانمان ئەو هێزانەی لەودیو سنووری سووریاوە جێگیر بوونە، ڕووینەداوە.

 

کاریگەریی و لێکەوتەکان: لەگەڵ دەستپێکی پێشڕەوییەکانی هێزەکانی ئۆپۆزیسیۆنی سووریا تاوەکو ڕاگەیاندنی کەوتنی دیمەشق و کۆتاییهێنان بە دەسەڵاتەکەی بەشار ئەسەد، عێراق ترسی خۆی لەوە نەشاردووەتەوە پریشکی ئەو ئاگرە ئەوانیش بگرێتەوە.