حکومەتی کاتیی سووریا داوا لە ئیسرائیل دەکات لە خاکی وڵاتەکەی بکشێتەوە

ئاڤا نیوز

 

حکومەتی کاتی سووریا لەبارەی لەشکرکێشییەکانی سووپای ئیسرائیل بۆ ناو خاکی وڵاتەکەی داوایەک لە ئەنجوومەنی ئاسایشی نەتەوەیەکگرتووەکان دەکات.

 

چیرۆکی سەرەکی: حکومەتی کاتی سووریا بە سەرکردایەتی محەممەد بەشیر لە ڕێککەوتی 9ـی کانوونی یەکەم داوایەکی ئاراستەی  ئەنجوومەنی ئاسایشی نەتەوە یەکگرتووەکان کرد و ئەمڕۆ شەممە لە ڕێگەی باڵیۆزی سووریا لە نەتەوەیەکگرتووەکان گەیشتووەتە دەست ئەنجوومەکە، لە نامەکەدا هاتووە: پێویستە ئیسرائیل ناچار بکرێت دەستبەجێ هێرشەکانی بۆ سەر خاکی سووریا بوەستێنێت، لەو ناوچانەش بکشێتەوە کە کۆنتڕۆڵی کردووە.

 

بۆچی گرنگە: سوپای ئیسرائیل کەوتنی دەسەڵاتی بەشار ئەسەد بە دەرفەت زانی بۆ ئەوەی سوپای سووریا لاواز بکات، بۆ ئەو مەبەستەش لە ماوەیەکی کەمدا سەدان هێرشی بۆ سەر فرۆکەخانە، کۆگای چەک و تەقەمەنی لە سووریا ئەنجام دا، بەتایبەت بەرزاییەکانی جۆلان کە ئیسرائیل وەک بەشێک لە خاکەکەی خۆی دەبینێت.

 

لەلایەکی دیکەوە: نووسینگەی بنیامین نەتانیاهۆ، سەرۆکوەزیرانی ئیسرائیل پێشتر ئاماژەیی بەوەکردووە کە ئیسرائیل تەنیا بە شێوەیەکی کاتیی لە سنووری سووریان و مانەوەیان کاتییە، تاوەکو ئەو کاتەی هێزێک پێکدەهێنرێت کە پابەند بێت بە ڕێککەوتنی 1974 بۆ ئاسایشی سنوورەکان.