تەرمی ئەو دایك و كچە كوردەی لە ئیجە خنكان دەگەڕێنرێتەوە هەرێمی كوردستان

ئاڤا نیوز

 

دوای تێپەڕبوونی زیاتر لە دوو هەفتە بەسەر خنكانیان لە دەریای ئیجە، تەرمی دایك و كچێكی خەڵكی هەرێمی كوردستان گەڕێندرایەوە.

چیرۆكی سەرەكی: ڕۆژی 28-11-2024، بەلەمێكی چوپی كۆچبەران لە باكووری دوورگەی سامۆسی وڵاتی یۆنان لەنێو دەریای ئیجە تووشی ڕوەداوێک دەبن و بەو هۆیەوە چوار كۆچبەر خنكان كە دووان لە كۆچبەرەكان دایكێک و كچێكی كوردی دانیشتووی شارۆچكەی چەمچەماڵ بوون و باوكەكەش بە ناوی كاوێز سەعدوڵڵا لە ڕووداوەکە ڕزگاری بوو.

زانیاریی بەدەستهاتوو: دایكەكە ناوی نایلە مستەفایە و كچەكەش ناوی نور كاوێزە و تەمەنی تەنیا 10 مانگ بووە، ئەو خێزانە ویستوویانە بە سواری بەلەمێكی چوپ لەگەڵ زیاتر لە 30 كۆچبەری دیكە بگەنە وڵاتی یۆنان، بەڵام لەنێو دەریای ئیجە كاتێك پۆلیسی یۆنان دەگاتە نزیكیان، شۆفێرەكە بەلەمەكە بە شاخێكدا دەكێشێ و بەو هۆیەوە چوار كۆچبەر دەكەونە نێو دەریاوە و دەخنكێن.

 

ڕاگەیێنراوی فەرمی: دەزگا لوتكە بۆ كاروباری ئاوارە و پەنابەران ڕایگەیاند: بەرەبەیانی ئەمڕۆ شەممە 14-12-2024، تەرمی ئەو دایك و كچە لەڕێگەی فڕۆكەوە گەڕێندرایەوە فڕۆكەخانەی نێودەوڵەتیی سلێمانی.