عێراق گوژمەیەکی دیکەی پارەی گەنمی جووتیارانی ڕەوانە کرد

ئاڤا نیوز

 

ئەمڕۆ چەکی کۆتا بڕە پارەی شایستە داراییەکانی جووتیارانی هەرێمی كوردستان بۆ ساڵی 2024 خرایەسەر هەژماری وەزارەتی بازرگانی و پیشەسازی  و بڕیارە لەماوەی چەند ڕۆژێکدا ڕێکارە كارگێڕییەكان تەواودەکرێت و دەست بە دابەشکردنی دەکرێت.

 

وێنە گەورەکە: ئەمساڵ بڕی 598 ملیار دینار لەلایەن حكومەتی فیدڕاڵییەوە وەك شایستەی دارایی جووتیارانی هەرێمی کوردستان دیاریكرا، لەماوەی ڕابردووشدا بە چەند گوژمەیەک پارە نێردراوە، ئەوەی ئەمڕۆ گەیشت دوایین گوژمە بوو.

 

لێدوانی فەرمی: محەممەد حەنون، گوتەبێژی وەزارەتی بازرگانی عێراق تایبەت بە ئاڤای ڕایگەیاند، دوای هەوڵ و كۆششی وەزارەتی بازرگانی لەگەڵ وەزارەتی دارایی عێراق، توانرا دواهەمین بڕە پارەی شایستەكانی جووتیارانی هەرێمی كوردستان و پارێزگاكانی نەینەوا و كەركووك خەرج بكرێت کە بڕکەی 125 ملیار و 852 ملیۆن و 997 هەزار بوو، جووتیاران ئێستا دەتوانن سەردانی فەرمانگە بازرگانییەكان بكەن لە پارێزگاكان بۆ وەرگرتنی چەكی بانكی بۆ خەرجكردنی شایستە داراییەكانیان.

 

ئەوەی پێویستە بیزانیت: بڕە پارەی ماوە لە شایستەی جووتیاران بەگوێرەی پارێزگاكان بەمشێوەیە:
بڕی 47 ملیار و 642 ملیۆن و 421 هەزار بۆ جووتیارانی پارێزگای سلێمانیە.
بڕی 44 ملیار و 45 ملیۆن و 43 هەزار بۆ جووتیارانی پارێزگای هەولێرە.
بڕی 34 ملیار و 165 ملیۆن و 553 هەزار بۆ جووتیارانی پارێزگای دهۆكە.