سەندیکای پارێزەرانی کوردستان داوایەک ئاراستەی ئەنجوومەنی وەزیران دەکات

ئاڤا نیوز

 

سەندیکای پارێزەرانی کوردستان جەخت لە پێدانی زەوی بۆ پارێزەران دەکاتەوە، نەقیبی سەندیکاکەش دەڵێت، "داوامان کردووە پارێزەرە نوێیەکان لە دابەشکردنی زەوی سودمەندبن".

 

وێنە گەورەکە: بە بڕیاری سەرۆکوەزیران مەسرور بارزانی، دوای تێپەڕینی 18 ساڵ، پرۆسەی دابەشکردنی زەوی دەستیپێکردەوە، نزیکەی 200 هەزار فەرمانبەر و خانەنشین لە بڕیارەکە سودمەند دەبن، هەر کەسێک 200 مەتر زەوی پێ دەدرێت.

 

لێدوانی فەرمی: بەختیار حەیدەر، نەقیبی سەندیکای پارێزەرانی کوردستان، بە ئاڤای ڕاگەیاند: پارێزەرانی کوردستان بەتایبەت گەنجەکان کە تازە بوون بە ئەندام، مافی خۆیانە لە دابەشکردنی زەوی سودمەند ببن، چونکە بەشێکی زۆریان کاریان نییە و توانای ماددیان باش نییە.

 

نەقیبی سەندیکای پارێزەران گوتیشی: نووسراوی فەرمیمان ئاراستەی ئەنجوومەنی وەزیران کردووە، بۆ ئەوەی پارێزەرانیش لەو زەویانە سوودمەندببن، وەکو فەرمانبەر مامەڵەیان لەگەڵ بکرێت، چاوەڕوانی ڕەزامەندی ئەنجوومەنی وەزیرانین.

 

ئەمەش بزانە: نزیکەی 14 هەزار پارێزەر لە سەندیکای پارێزەرانی کوردستان ئەندامن.