سەرۆک بارزانی پێشوازی لە پەیامەکەی ئەحمەد شەرع دەکات

ئاڤا نیوز

 

دوای لێدوانەكەی ئەحمەد شەرع، فەرماندەی گشتیی دەستەی تەحریرولشام كە گەلی كوردی وەك بەشێكی سەرەكی و هاوبەش لە سووریای داهاتوو ناوبردبوو سەرۆك بارزانی پێشوازیی لەو بۆچوونە دەکات و بە دەستپێكی باش بۆ "ڕاستكردنەوەی ڕێڕەوی هەڵەكانی مێژوو و مامەڵەی نادروست بەرانبەر گەلی كورد لە سووریا وەسف دەکات".

پەیامی فەرمی: سەرۆک بارزانی لە پەیامەكەیدا ڕایگەیاند، "ئەم تێڕوانینە بۆ کورد و داهاتووی سووریا جێگەی خۆشحاڵییە و پێشوازیی لێ دەکەین، هیوادارین ئەمە دەستپێکێک بێت بۆ ڕاستکردنەوەی ڕێڕەوی مێژوو و ڕاستکردنەوەی ئەو مامەڵە هەڵە و نادروستەی لەبەرانبەر گەلی کورد لە سوریا ئەنجام دەدرا."

 

سەرۆك بارزانی جەختی لەوەشكردەوە، ئەم جۆرە تێڕوانینە ڕێخۆشکەرە بۆ بنیاتنانی سووریایێکی بەهێز، پێویستە کورد و عەرەب و سەرجەم پێکهاتەکانی تری سووریا، سوود لەم دەرفەتە وەربگرن بۆ ئەوەی پێکەوە لە دامەزراندنی وڵاتێكی سەقامگیر و ئازاد و دیموکرات، بەشدار بن.

 

 لەلایەکی دیکە: پێشتر ئەحمەد شەرع، فەرماندەی گشتیی دەستەی تەحریر شام لەبارەی کێشەی کورد لە سووریا ڕایگەیاندبوو: "کورد بەشێکە لە نیشتمانەکەمان و وەکو ئێمە رووبەڕووی زوڵمی زۆر بوونەتەوە، بە رووخانی رژێم ئەو زوڵمەی تووشیان بوو نامێنێت و پشتیوان بە خودا لە سووریای داهاتوو کورد بەشێكی سەرەکی دەبێت.

 

ئەحمەد شەرع ئاماژەی بۆ ئەوەش کردبوو،  "لەگەڵ کورد پێکەوە دەژین و هەموومان بەپێی یاسا مافی خۆمان وەردەگرین، لەمڕۆوە هیچ زوڵمێک لە کورد ناکرێت و مێژووی نوێ و دەرگایەکی نوێ دەکەینەوە".