سەرکردایەتیی نوێی سووریا لەڕێگەی ئاڤاوە وەڵامی پەیامەکەی سەرۆک بارزانی دەداتەوە

ئاڤا نیوز

یەکێک لە سەرکردەکانی سەرکردایەتیی نوێی سووریا، پەیوەندی گەلی سووریا لەگەڵ سەرۆک بارزانی بە دێرین ناو دەبات و پەیامەکەی سەرۆک بارزانیش بۆ سەرکردایەتیی نوێی سووریا بە گرنگ و پڕبایەخ دەزانێت، ئاماژە بۆ ئەوەش دەکات سەرۆک بارزانی لە کاتە سەختەکاندا لەگەڵ گەلی سووریادا بووە.

 

وێنە گەورەکە: سەرۆک بارزانی ئەمڕۆ لە پەیامێکدا پێشوازی لە پەیامەکەی ئەحمەد شەرع، فەرماندەی گشتیی دەستەی تەحریرولشام کرد لەبارەی داهاتووی کورد لە سووریا و هیوای خواست "ئەمە دەستپێکێک بێت بۆ ڕاستکردنەوەی ڕێڕەوی مێژوو و ئەو مامەڵە هەڵە و نادروستەی لە بەرامبەر گەلی کورد لە سووریا دەکرا". 

 

لێدوانی فەرمی: حەسەن دەغیم، سەرکردە لە سەرکردایەتیی سیاسیی نوێی سووریا بە ئاڤا نیوزی ڕاگەیاند: "پەیوەندی گەلی سووریا لەگەڵ سەرۆک مەسعود بارزانی پەیوەندییەکی دێرینە، هاووڵاتیانی سووریا ڕێزێکی بێپایانیان بۆ گەلی کورد و فەخامەتی سەرۆک بارزانی هەیە، لە کاتە سەختەکاندا لەگەڵیان بووە بەتایبەت ڕۆڵ و ڕاسپاردەیان بۆ لەخۆگرتنی پەنابەرانی سووریا لە کاتی شۆڕشی سووریا کە ئاوارەی هەرێمی کوردستان بوون.

 

سەبارەت بەو پەیامەشی کە ئاراستەی ئەحمەد شەرعی کردووە، حەسەن دەغیم دەڵێت: پەیامەکە لە ڕاددەبەر گرنگ و لە شوێنی خۆیدا بوو، وەک دراوسێیەکی سوورییەکان و سیمبۆلێک بۆ گەلی کورد لە سووریا. هاوکات پەیامەکە لەو کاتەدا جێگەی بایەخێکی زۆرە و پاڵپشتی لە گواستنەوەی دەسەڵات دەکات لە حکومەتی نوێی دیمەشق و مایەی خێر بۆ هەموو هاووڵاتیانی سووریا.

 

باکگراوند: پێشتر ئەحمەد شەرع (ئەبوو محەممەد جۆلانی) لەبارەی کێشەی کورد لە سووریا ڕایگەیاندبوو: "کورد بەشێکە لە نیشتمانەکەمان و وەکو ئێمە ڕووبەڕووی ستەمی زۆر بوونەتەوە، بە ڕووخانی ڕژێم ئەو ستەمەی تووشیان بوو نامێنێت و پشتیوان بە خودا لە سووریای داهاتوو کورد بەشێكی سەرەکی دەبێت، لەگەڵ کورد پێکەوە دەژین و هەموومان بەپێی یاسا مافی خۆمان وەردەگرین، لەئەمڕۆوە هیچ ستەمێک لە کورد ناکرێت و مێژووی نوێ و دەرگایەکی نوێ دەکەینەوە".

ئەحمەد شەرع جەختیشی کردەوە لای ئەوان پەکەکە و کورد لەیەک جیاوازن. دووپاتیشی کردەوە نابێت هیچ هێزێکی چەکدار لە دەرەوەی سوپای سووریا بمێنێت.