لەبارەی یەکسانکردنی بڕوانامە جارێکی دیکە نووسراو بۆ سەرجەم وەزارەتەکان دەکرێت

ئاڤا نیوز

تاوەکو ئێستا ژمارە و زانیاری پێویست لەبارەی ئەو فەرمانبەرانەی بێ مۆڵەت لە ساڵانی ڕابردوودا خوێندوویانە کۆنەکراوەتەوە، بۆیە جارێکی دیکە نووسراوێک بۆ سەرجەم وەزارەتەکان دەگشتێنرێت و دوو خاڵی بۆ زیاد دەکرێن،  فەرمانبەرەکان ژمارەیان چەندە؟ ئێستا مووچەیان چەندە و دوای یەکسانکردنی بڕوانامەیان دەبێتە چەند؟

 

ئەوەی پێویستە بیزانیت: ئەو فەرمانبەرانە تاوەکو ئێستا ژمارەیان بە دروستی نازانرێت، بەڵام هەزاران کەسن و لە ساڵانی 2013 بۆ 2019 خوێندوویانە، ماوەی 11 مانگیشە بڕیاری هەژمارکردنی بڕوانامەکانیان  دەرچووە، بەڵام تاوەکو ئێستا جێبەجێ نەکراوە.

چیرۆکی سەرەکی: سەرەتای ئەمساڵ حکومەتی هەرێمی کوردستان بڕیارێکی لە بەرژەوەندی ئەو کەسانە دا کە بەبێ مۆڵەتی خوێندن چوونەتەوە بەر خوێندن و دیبلۆمی باڵا، ماستەر و دکتۆریان خوێندووە، بۆ ئەم مەبەستە لیژنەیەک بە سەرۆکایەتی ئاوات شێخ جەناب، وەزیری دارایی  لە وەزارەتەکانی دارایی، خوێندنی باڵا و پلاندانان پێکهێنرا،  بۆ ئەوەی بەدواداچوون لەسەر ئەو پرسە بکرێت بەمەبەستی یەکسانکردنی بڕوانامەکانیان.

ئەوکات بێ جیاوازی نووسراو بۆ گشت وەزارەتەکان کرا و فۆرمێکیان بۆ نێردرا، بۆ ئەوەی سەرجەم ئەو فەرمانبەرانی بێ مۆڵەت خوێندوویانە پڕی بکەنەوە، بەو مەبەستەی دواتر ناوی سەرجەمیان ئاراسەتی سەرۆکایەتیی ئەنجوومەنی وەزیران بکرێت و هەنگاوی کردەیی بۆ بنرێت، بەڵام ئێستا دەرکەوتووە فۆرمەکان بە دروستی پڕنەکراونەتەوە.

 

لێدوانە فەرمییەکان: نوێنەری وەزارەتی خوێندنی باڵا لە لیژنەکە بە ئاڤا نیوزی گوت، ئەم بابەتە لە وەزارەتی داراییە و ئەوان هیچ قسەیەکی لەبارەوە ناکەن.

ئەندامێکی وەزارەتی دارایی و ئابووریش لە لیژنەکە بە ئاڤای گوت: "دوای ئەوەی گشتاندنمان بۆ وەزارەتەکان نارد، وادیاربوو وەزارەتەکان بەپێی پێویست فۆرمەکانیان پڕنەکردبووەوە، وەزیری دارایی کە هاوکات سەرۆکی لیژنەکەیە، داوای ڕوونکردنەوەی لێکەوتەکانی ئەو پرۆسەیەی کردبوو، ئایا ئێستا چەند دەکەوێت و ئەگەر بڕوانامە هەژمارکرا مووچەیان دەبێتە چەند و بڕی چەند پارەی پێویستە؟ بۆیە بڕیار دراوە دووبارە گشتاندن بۆ سەرجەم وەزارەتەکان بکرێتەوە و دوو بڕگە بۆ فۆرمەکان زیاد بکرێت و پێویستە سەرجەم فەرمانبەرەکان پڕیبکەنەوە؛ مووچەی ئێستای چەندە؟ دوای هەژمارکردنی بڕوانامە مووچەکەی دەبێتە چەند؟

ئەمەش بزانە: هەر ئەمڕۆ کۆبوونەوەیەک لەسەر ئەو بابەتە کراوە، بۆ ئەوەی میکانیزمێک بدۆزرێتەوە بە چ شێوازێک دووبارە گشتاندن بۆ فۆرمەکە بکرێتەوە، ڕەچاوی ئەوەش بکرێت هەر وەزارەتێک لینکی تایبەت بە خۆی هەبێت، بۆ ئەوەی هیچ وەزارەتێک تێکەڵی وەزارەتێکی دیکە نەبێت.