پارتی و یەکێتی لە پیرمام کۆدەبنەوە

ئاڤا نیوز 

 

شاندی دانوستاندنکاری پارتی و یەکێتی سبەی لە پیرمام کۆدەبنەوە تاوتوێی پێکهێنانی کابینەی نوێی حکومەت و دوایین پێشهاتەکانی ناوچەکە دەکەن.

 

وێنە گەورەکە: دوای بەڕێوەچوونی هەڵبژاردنی پەرلەمانی کوردستان لایەنەکان لەبەردەم پێکهێنانی حکومەتی نوێدان، پارتی و یەکێتی وەک براوەی یەکەم و دووەمی هەڵبژاردن گفتوگۆ لەسەر پێکهێنانی کابینەی نوێ دەکەن، بۆ ئەو مەبەستەش گەڕی دووەمی کۆبوونەوەکانیان دەستپێدەکەن. 

 

لێدوانی فەرمی: دڵشاد شەهاب، ئەندامی شاندی دانوستانکاری پارتی بۆ ئاڤا نیوز ڕایگەیاند، "سبەی سێشەممە 17-12-2024 شاندی دانوستانکاری پارتی و یەکێتی لە پیرمام کۆدەبنەوە جگە لە پێکهێنانی حکومەتی نوێ، دوایین پێشهاتەکانی ناوچەکە بەتایبەت دۆخی سووریا گفتوگۆی نێوان شاندی هەردوولا دەبێت". 

 

زانیاریی بەدەستهاتوو: ئاڤا زانیویەتی پۆستەکانی دەستەی سەرۆکایەتیی پەرلەمان و پێکهێنانی کابینەی دەیەم پرسی سەرەکیی گفتوگۆی کۆبوونەوەکە دەبێت.

 

ئەمەش بزانە: شاندی پارتی پێکهاتوون هۆشیار زێباری، پشتیوان سادق، دڵشاد شەهاب و ئومێد سەباح، هاوکات شاندی یەکێتی لەپاڵ قوباد تاڵەبانی، ڕزگار حاجی، دەرباز کۆسرەت، ڕێواز فایەق و  شاڵاو شێخ سەڵاح پێکدێن و ئاماج ڕەحیم بۆ شاندەکە زیادکراوە.