یەکەم لێدوانی ئەسەد دوای هەڵاتنی

ئاڤا نیوز 

 

سەرۆککۆماری هەڵاتووی سووریا دەڵێت، بە ڕێککەوتن و لەژێر فشاردا وڵاتەکەی جێنەهێشتووە، بەڵکو جەختی لە ڕووبەڕووبوونەوەی "تیرۆستان" کردووەتەوە، بەڵام دوای کەوتنی دیمەشق و دوایین بنکەی سەربازیی سوپا، داوای لە ڕووسەکان کردووە بەرەو مۆسکۆ بچێت.

 

وێنە گەورەکە: دوای تێپەڕبوونی نیو سەدە لە حکومڕانی بنەماڵەی ئەسەد و 13 ساڵ بەسەر خۆپێشاندانەکانی سووریادا، بەرەبەیانی ڕۆژی یەکشەممە (08-12-2024) ئۆپۆزیسیۆن چەکداریی ئەو وڵاتە، دیمەشقی پایتەختی کۆنترۆڵ کرد و بەشار ئەسەد سەرۆکی وڵاتەکە بەرەو ڕووسیا هەڵهات.

 

لێدوانی فەرمی: بەشار ئەسەد، سەرۆککۆماری هەڵاتووی سووریا، لەڕێگەی پەیجی سەرۆکایەتیی کۆماری سووریا لە تێلێگرام یەکەم پەیامی دوای جێهێشتنی وڵاتەکەی بڵاوکردەوە و ئەمە بەشێک لە گوتەکانییەتی: 

 

- هیچ کاتێک بژاردەکانی چارەسەر لە سووریا بریتیی نەبوون لە وازهێنانی سەرۆک، بەڵکو ڕووبەڕووبوونەوەی "تیرۆستان" بژاردەی سەرەکی و کۆتایی بووە.

 

- سەرۆککۆماری هەڵاتووی سووریا باس لە چۆنیەتی چوونە ڕووسیا کردووە و ڕایگەیاند:  تاوەکو بەرەبەیانی ڕۆژی 8ـی ئەم مانگە لە دیمەشقەوە کارەکانی کردووە، بەڵام دوای گەیشتنی "تیرۆستان" بە دیمەشق، بە هاوکاری ڕووسەکان چووەتە بنکەی حەمیمی سەربازی لە لازقییە، بەڵام دوای ئەوەی بینیویەتی سوپا لە هەموو بەرەکان شکاوە و خودی بنکەکەش مەترسی هێرشی درۆنی لەسەر بووە، داوای کردووە دەرچەیەک بۆ دەستبەجێ گواستنەوەی بۆ مۆسکۆ دابین بکرێت.

 

- ئەو پڕۆژەیەکی نیشتیمانی هەبووە نەک کەسی، بۆیەش بە کەوتنی دەوڵەت بەدەستی "تیرۆستان"، هیچ مانایەک بۆ بەرپرسان نەماوە کە لە سووریادا بمێننەوە، جەختیش دەکاتەوە کە ئەو لەهەر پلە و پۆستێکدا بێت، لایەنگیریی و دڵسۆزیی بۆ سووریای ئازاد و بۆ نیشتیمان هەر دەمێنێت. 

 

کۆپییەک لە پەیامەکەی ئەسەد:-