حکومەتی عێراق: ماهر ئەسەد لە عێراق نییە

ئاڤا نیوز

 

وەزارەتی ناوخۆی عێراق ڕەتیدەکاتەوە ماهر ئەسەد، برای سەرۆکی پێشووی سووریا لە عێراق بێت.

 

وێنە گەورەکە: لە چەند ڕۆژی ڕابردوو و دوای کەوتنی دەسەڵاتی بەشار ئەسەد و هەڵاتنی بۆ مۆسکۆ لە ڕووسیا، دەنگۆی ئەوە بڵاوبووەتەوە کە ماهر ئەسەد برای بەشار ئەسەد لە عێراق بێت.

 

ڕاگەیێنراوی فەرمی: میقداد میری، وتەبێژی وەزارەتی ناوخۆی عێراق ڕایگەیاند: ئەو دەنگۆی لە تۆڕە کۆمەڵایەتییەکان بڵاوکراونەتەوە دەربارەی ماهر ئەسەد برای بەشار ئەسەد، سەرۆکی پێشووی سووریا لە عێراقە دوورن لە ڕاستییەوە.

 

زانیاریی زیاتر: ئەمەش لە کاتێکدایە بەشێک لە میدیا عەرەبییەکان باس لەوە دەکەن کە ماهر ئەسەد هاتووەتە شاری سلێمانی و لەوێ ماوەتەوە، بەڵام دوای ئەوەی ئاڤا میدیا میدیا بەدواداچوونی کرد، سەرچاوە فەرمییەکان باسیان لەوە کرد کە برای بەشار ئەسەد لە سلێمانی نییە. 

 

ئەوەی پێویستە بیزانیت: ڕۆژی 08-12-2024 گرووپە چەکدارەکانی ئۆپۆزیسیۆنی سووریا توانییان دیمەشقی پایتەختی سووریا کۆنتڕۆڵ بکەن، هاوکات بەشار ئەسەد و خێزان و منداڵەکانی بەرەو مۆسکۆ هەڵاتن لە کاتێکدا تاوەکو ئێستا چارەنووسی بەشێکی زۆری خانەوادەی ئەسەد نادیارە.