حەوت خاڵ یاسای نەوت گاز لە ئەنجوومەنی نوێنەرانی عێراق پەكدەخەن

ئاڤا نیوز

 

حەوت خاڵی پرۆژەیاسای نەوت و گاز کە "کارگێڕی و پیشەیین" ناکۆکییان لەسەرە. ئەندامێکی لیژنەی نەوت و گازیش دەڵێت "تاوەکو ناکۆکییەکان یەکلایی نەکرێنەوە ناکرێت یاساکە تێپەڕێنرێت".

 

وێنە گەورەکە: پرۆژەیاساکە بۆ ڕێکخستنەوەی کەرتی نەوت و گازە لە عێراق و بە یەکێک لە گرنگترین یاساکان دادەنرێت. هەرێمی کوردستان و پارێزگاکانی دیکەش ڕۆڵیان لە داڕشتنی سیاسەتی نیشتمانیی کەرتی وزە دەبێت، دوای تێپەڕاندنیشی بەپێی شایستەیی خۆیان پشکیان پێدەدرێت و بەشێک لە داهاتەکەیان بۆ خەرج دەکرێتەوە.

بۆچی گرنگە: یاسای نەوت و گاز مشتومڕ و کێشەکانی نێوان هەولێر و بەغدا لەبارەی دەرهێنان و گواستنەوە و هەناردەکردنی نەوت چارەسەر دەکات، بەتایبەت کە ساڵی 2022 دادگای باڵای فیدراڵی عێراق یاسای نەوت و گازی هەرێمی کوردستانی هەڵوەشاندەوە و نزیکەی ساڵێکیشە هەناردەی نەوتی کوردستان ڕاگیراوە.

چیرۆکی سەرەکی: زیاتر لە شەش مانگە محەممەد شیاع سوودانی، سەرۆکوەزیرانی عێراق ڕەشنووسی پرۆژەیاساکەی خستووەتە بەردەم لایەنەکان. لەوکاتەوە لیژنەیەکی هونەری و یاسایی بە بەشداریی پارێزگا بەرهەمهێنەرەکان و نوێنەرانی هەرێمی کوردستان گەڵاڵەی دەکەن، بەڵام تاوەکو ئێستا نەگەیشتوونەتە ڕێککەوتن، ئێستاش ڕەشنووسەکە بەبێ دەستکاری و هەموارکردن ڕەوانەی حکومەت کراوەتەوە.

لێدوانی فەرمی: عەلی مەشکوور، ئەندامی لیژنەی نەوت و گازی ئەنجوومەنی نوێنەرانی عێراق بە ڕۆژنامەی سەباحی ڕاگەیاندووە: پشکی هەرێمی کوردستان لە بودجە لەسەر بنەمای نرخی نەوتی هەناردەکراو دیاریکراوە، ئێستاش ئەو بڕە پارەیەی بەغدا بۆی دەنێرێت لە پارەی نەوتەکەی نییە، ئەوەش لە داهاتوودا بەربەست بۆ بودجە دروست دەکات، لەگەڵ ئەوەی کە پشکێکی جێگیرە و مافی هاووڵاتیانی هەرێمی کوردستانە".

باکگراوند: لە ساڵی 2007 ەوە چوارەم جارە پڕۆژەیاسای نەوت و گاز ئامادەبکرێت و ڕەوانەی پەرلەمان بکرێت، بەڵام لایەنەکان بەتایبەت هەولێر و بەغدا نەگەیشتوونەتە ڕێککەوتن.