مەسرور بارزانی و فەرماندەی هاوپەیمانان: پێویستە مافەکانی گەلی کورد لە سووریا دابین بکرێن

ئاڤا نیوز

سەرۆکوەزیران مەسرور بارزانی و فەرماندەی هاوپەیمانان لە عێراق و سووریا، بەپێویستی دەزانن مافەکانی گەلی کورد و سەرجەم پێکهاتەکان لە سووریا دابین بکرێن. جەختیش لە یەکخستنی هەوڵەکان دەکەنەوە بۆ ڕووبەڕووبوونەوەی داعش و تیرۆر.

وێنە گەورەکە: دوای ڕووخانی حکومەتی بەشار ئەسەد، ئێستا چاوەکان لەسەر پێکهێنانی حکومەتی نوێی سووریا و نووسینەوەی دەستوورن لەو وڵاتەدا، یەکێک لە گرنگترین پرسەکانیش ئایندەی گەلی کورد و ڕۆژئاوای کوردستانە لە سووریای نوێدا. لەلایەکی دیکەوە مەترسی هەیە ڕێکخراوی داعش سوود لە دۆخەکە وەربگرێت و خۆی بەهێز بکاتەوە.

چیرۆکی سەرەکی: سەرۆکوەزیران مەسرور بارزانى لە هەولێر لەگەڵ جەنەراڵ کێڤن لێیهی، فەرماندەی گشتیی هێزەكانی هاوپەیمانان لە عێراق و سووریا و شاندێکی یاوەری کۆبووەوە.

ڕاگەیێنراوی فەرمی: بەپێی ڕاگەیێنراوێکی حکومەتی هەرێمی کوردستان، له کۆبوونەوەکەدا گفتوگۆ لەبارەی سێ تەوەر کراوە:

یەکەم: دۆخی گشتیی هەرێمی کوردستان، عێراق، سووریا، پەرەپێدانی هاریکاری و هاوئاهەنگیی نێوان هەردوولا بۆ ڕووبەڕووبوونەوەی هەڕەشە و مەترسییەکانی داعش و تیرۆر.

دووەم: لەبارەی گۆڕانکاری و پەرەسەندنەکانی سووریا هەردوولا هاوڕا بوون لەسەر پێویستی پاراستنی ئاسایش و ئارامیی سووریا و دابینکردن و ڕێزگرتن لە مافەکانی گەلی کورد و پێکهاتەکانی دیکەی ئەم وڵاتە.

سێیەم: پێشکەوتنەکانی یەکخستنی هێزەکانی پێشمەرگە و چاکسازییەکانی وەزارەتی کاروباری پێشمەرگە.