پاپا فرانسیس: لەکاتی سەردانەکەم بۆ عێراق هەوڵی تیرۆرکردنم درا

ئاڤا نیوز

 

پاپای ڤاتیکان نهێنییەکی سەردانەکەی بۆ عێراق ئاشکرا  دەکات و ئاماژە بۆ ئەوە دەکات ئەوەندەی نەمابوو "بە تەقینەوەوەیەکی خۆکوژی بکوژرێم".

 

وێنە گەورەکە: پاپای ڤاتیکان  لە كتێبی "هیوا هەرگیز نائومێدی دروست ناكات" کە بەشێکە لە ژیاننامەکەی، باس لەو سەردانەی دەکات کە ساڵی 2021 بۆ عێراق و بە دیاریکراویش بۆ شاری موسڵ ئەنجامی داوە و ئاماژە بۆ ئەوە دەکات هەوڵی "تیرۆرکردنی" دراوە.

 

بڵاوکراوەی فەرمی: بەگوێرەی ڕاپۆرتێکی ڕۆژنامەی کۆریێری دێلا سێرای ئیتاڵی، باس لەو بەشەی نێو کتێبەکەی پاپا فرانسیس دەکات کە بە هاوکاری لەگەڵ نووسەری ئیتاڵی کارلۆ موسۆ نووسراوە، ئاماژە بۆ ئەوە دەکات ئەوکاتەی پاپا فرانسیس گەیشتە بەغدا دەزگای هەواڵگریی بەریتانیا پۆلیسی عێراقی لەوە ئاگادار کردووەتەوە ژنێکی خۆکوژ بەرەو بەرەو شاری موسڵ دەچێت بۆ ئەو شوێنەی کە پاپا بۆی دەچێت.

 

زانیاریی زیاتر: ئەم خانمە بەنیازبووە لەکاتی سەردانەکەی پاپادا خۆی بتەقێنێتەوە، نەک تەنها ئەوە، هاوکات بارهەڵگرێکی بۆمبڕێژکراویش بەرەو شوێنی سەردانەکەی پاپا لەوکاتەدا بۆ هەمان مەبەست ڕۆشتووە.

 

پووچەڵکردنەوەی پلانەکە: بەگوێرەی زانیارییەکانی نێو کتێبەکە خۆکوژەکان پلانیان داناوە لە کاتی سەردانەکەیدا پاپا بکوژن، بەڵام پێش ئەنجامدانی هێرشەکە کوژراون.

 

شێوازی جێبەجێکردن: پاپا فرانسیس لە کتێبەکەدا دەڵێت دواتر داوای لە ئاسایشی ڤاتیکان کردووە ئاگاداری بکەنەوە لە وردەکارییەکانی خۆکوژەکان. فەرماندەکە بە کورتی وەڵامی داوەتەوە کە ئەوان "چیتر بوونیان نییە".

 

ئەوەی پێویستە بیزانیت: ئەم کتێبەی پاپا فرانسیس، بڕیار بوو دوای مردنی پاپا بڵاو بکرێتەوە. بەڵام بڕیارە لە مانگی کانوونی دووەمی 2025 لە زیاتر لە 80 وڵات بڵاو بکرێتەوە.