بەگوێرەی چەند بەڵگەنامەیەك بەشار ئەسەد و ئیسرائیل پەیوەندییان هەبووە

ئاڤا نیوز

 

دوای ڕووخانی ئەسەد و دۆزینەوەی بەڵگەنامەکانی هەواڵگری سووریا کە بەشێکیان کەوتوونە دەست خەڵک، دەردەکەوێت بەشار ئەسەد و ئیسرائیل پەیوەندییان هەبووە، تەنانەت بەشار ئەسەد لەم ساڵانەی دوایی زانیاریی لەسەر جمووجوڵی ئێرانیەکان  بارەگاکانییان و بارەگای گرووپە چەکدارەکان و تەنانەت حەماسیش داوە بە ئیسرائیل.

 

زانیاریی بەدەستهاتوو: لە یەکێک لە بەڵگەنامەکاندا، نامەیەکی ئیسرائیل ئاشکرا بووە کە بۆ بەشار ئەسەدی ناردووە، داوای لیکردووە، نەهێڵێت، ئێران هاوکاری سەربازیی بگەیێنێتە حیزبوڵڵای لوبنان، بۆ ئەو مەبەستەش چەند جارێک ئەو بارهەڵگرانەی کە چەک و تەقەمەنیان لە سووریاوە دەگواستەوە بۆ حیزبوڵڵا لە لوبنان دەکرانە ئامانج و دەتەقێندرانەوە.

زانیاریی زیاتر: هەروەها لە 8 مانگی  ساڵی ڕابردوو بەرپرسێکی ئیسرائیل نامەی ناردووە بۆ دیمەشق ڕێگە نەدەن حەماس لە جۆلانەوە هێرش بکاتە سەر ئیسرائیل و مووشەک بتەقێنێت.

لەلایەکی دیکە: تەنانەت ئیسرائیل هەڕەشەی ئەوەیشی لە بەشار ئەسەد کردووە ئەگەر پەیوەندی و هاوکاریت لەگەڵ ئێران بەردەوام بێت، ئەوا تەلئەڤیڤ هێرشدەکاتە سەر دامەزراوەکانی.

ئەمەش بزانە:  ڕژێمی ئەسەد و ئیسرائیل هەماهەنگییەکی باشیان هەبووە لەم ساڵانەی دوایی، دژی بەرژەوەندی و بارەگاکانی ئێران لە سووریا کاریان کردووە، ئەوە بووە لە 7 ئایاری 2023 سوپای ئیسرائیل بە هەماهەنگی لەگەڵ ڕژێمی بەشار ئەسەد هێرشی کردووەتەوە سەر کۆگایەکی چەکی ئێران و گرووپە چەکدارەکانی.