نەشتەرگەریییەکی شێرپەنجەی زمان لە نەخۆشخانەیەکی حکومی هەولێر بۆ هاونیشتمانییەک دەکرێت

ئاڤا نیوز

 

نەشتەرگەرییەکی شێرپەنجەی زمان لە نەخۆشخانەی ڕزگاری شاری هەولێر بۆ نەخۆشێک کرا، کە لە قۆناغەکانی سەرەتای توشبوون بە نەخۆشییەکە بوو. پزیشکی سەرپەرەشتیاری نەخۆشییەکەش دەڵێت "توانیمان دوای حەوت کاتژمێر نەشتەرگەرییەکە تەواو بکەین".

 

چیرۆکی سەرەکی: ڕۆژی 17-12-2024، لە نەخۆشخانەی ڕزگاری شاری هەولێر، لەلایەن تیمێکی پزیشکی پسپۆڕەوە نەشتەرگەری بۆ پیاوێکی تەمەن 58 ساڵ کرا، کە توشی نەخۆشی شێرپەنجەی زمان بوبوو.

 

لێدوانی فەرمی: د.سەعید توتمەیی، پزیشکی پسپۆڕ و سەرپەرشتیاری نەشتەرگەرییەکە بە ئاڤای ڕاگەیاند: کاتژمێر 09:00 سەرلەبەیانی دەست بە نەشتەرگەرییەکە کرا و کاتژمێر 04:00ی ئێوارە تەواوی بکەین.

 

ئەو پزیشکە گوتیشی، نەخۆشەکە شێرپەنجەی زمانی هەبوو، لیمفە گرێکانی بۆ خاوێنکرایەوە، دواتر پێویستە پشکنینی بۆ بکرێت، ئەگەر پێویست بوو ئەوا دەبێت چارەسەری کیمیایی و تیشک وەربگرێت، هەروەها دەبێت بۆ ماوەی دوو ساڵ لە ژێر چاودێری پزیشک بێت، بۆ ئەوەی بەتەواوی نەخۆشییەکەی بنەبڕ ببێت.

 

هۆکارە زانراوەکان: شێرپەنجەی زمان بەهۆی جگەرەکێشان، ڤەیپ، نێرگەلە و خواردنەوە کحولییەکان سەرهەڵدەدات.

 

مەترسییە پێشبینیکراوەکان: شێرپەنجەی زمان بۆ قوڕگ و سنگ و سی و بەشەکانی دیکەی جەستە دەگوازرێتەوە، ئەگەر نەخۆش لە قۆناغەکانی سەرەتادا چارەسەر وەرنەگرێت، ئەوا لە جەستەیدا بڵاو دەبێتەوە و ڕەنگە بەوهۆیەوە گیان لەدەست بدات.