کار بۆ خەرجکردنی شایستەی دارایی دوو مانگی مامۆستایانی گرێبەست دەکات

ئاڤا نیوز

وەزارەتی پەروەردە کار بۆ خەرجکردنی شایستەی دارایی مانگەکانی حەوت و هەشتی مامۆستایانی گرێبەست لە سنووری هەولێر و دهۆک دەکات بۆ ئەوەی بەزووترین کات خەرج بکرێت.

 

وێنە گەورەكە: مامۆستایانی گرێبەست لە پارێزگاکانی هەولێر و دهۆک ماوەی 180 ڕۆژە تەنیا 400 هەزار دیناریان وەرگرتووە و هێشتا شایستەی دارایی مانگەکانی حەوت و هەشتیان بۆ خەرج نەکراوە، بەڵام لە سلێمانی و دەوروبەری ئەم هەفتەیە شایستەی دارایی هەردوو مانگیان بۆ خەرج کرا.

لێدوانی فەرمی: عەلی ڕەئوف، نوێنەری مامۆستایانی گرێبەست بە ئاڤا میدیای ڕاگەیاند: " بەدواداچوونم کرد دەڵێن ئەفزەلیەت بۆ مووچەیە نەک خەرجی، چونکە شایستەی دارایی لە چوارچێوەی خەرجییەکانە".

بۆچوونی بەرامبەر: عومەر محەممەد، بەڕێوەبەری ژمێریاری لە بەڕێوەبەرایەتیی پەروەردەی هەولێر بە ئاڤا نیوزی ڕاگەیاند: "هۆكاری خەرجنەكردنی شایستەی دارایی ئەو دوو مانگە بۆ ئەوە دەگەڕێتەوە، كاتی خۆی وانەبێژان كە بوونە گرێبەست خۆیان داوایان كرد ڕاستەوخۆ لەگەڵ مامۆستایان مووچەی مانگی 9 وەربگرن، ئەوكات ڕێكارەكانی خەرجكردنی شایستەی دارایی مانگەکانی حەوت و هەشتیان بۆ نەکرا".

 

چارەسەر: بەگوتەی عومەر محەممەد؛ ئێستا وەزارەتی پەروەردە چاوەڕێی گەنجینەكانی ئەو دوو پارێزگایە دەکات تاوەکو چەکی بانکی بۆ خەرجکردنی شایستەی دارایی ئەو دوو مانگەی مامۆستایانی گرێبەست بکرێت و دواتر دەست بە دابەشکردنی بکرێت.

لەلایەکی دیکەوە: مامۆستایانی گرێبەست داوا دەکەن مووچەی مانگی 10 یان لەگەڵ مووچەی وەزارەتی پەروەردە بۆ خەرج بکرێت، کە بڕیارە ڕۆژی شەممە 21ی مانگ دابەش بکرێت، ئاڤا بەدواداچوونی کرد و زانیاری دەستکەوتووە ئەوانیش شەممە مووچەی مانگی 10 وەردەگرن.