ڕاوێژکارێکی پێشووی حکومەتی عێراق: مالیکی بیرۆکەکانی ئەسەدی لە عێراق دووبارە دەکردەوە

ئاڤا نیوز

ڕاوێژکارێکی پێشووی حکومەتی عێراق پەردە لەسەر چەند نهێنییەکی سەردەمی حکومڕانی نووری مالیکی هەڵدەداتەوە و ئاماژە بۆ ئەوە دەکات مالیکی بیرۆکەی ڕژێمی سووریا  لە عێراق دووبارە کردەوە، بەهۆیەوە دەیان هەزار هاووڵاتی عێراقی کوژران و برینداربوون.

 

وێنە گەورەکە: بەگوێرەی ڕاپۆرتەکانی مافی مرۆڤی عێراق، لەنێوان ساڵانی 2014 و 2016، زیاتر لە چارەکە ملیۆنێک هاووڵاتی عێراقی لە ناوچەکانی باکوور و ڕۆژئاوای عێراق کوژراون و بریندار بوون، لە ئەنجامی تۆپباران و بۆردومانکردنی ئەو شارانەی لە ژێر کۆنترۆڵی داعشدا بوون.

 

لێدوانی ڕۆژنامەوانی: عەقیل عەباس، ڕاوێژکاری پێشووی حکومەتی عێراق لە لێدوانێکی ڕۆژنامەوانیدا ڕایگەیاند: نووری مالیکی، سەرۆکوەزیرانی پێشووتری عێراق بیرۆکەی بۆمبی بەرمیلی لە بەشار ئەسەد، سەرۆکی ڕژێمی ڕووخاوی سووریا کۆپی کرد و لە ناوچەکانی ڕۆژئاوا و باکووری عێراق دووبارەی کردەوە.

 

ئەوەی لەوبارەیەوە دەگوترێت: عەقیل عەباس ئاماژە بۆ ئەوە دەکات "مالیکی ئەو بیرۆکەیەی لە ڕژێمی سووریا وەرگرتووە و ئەمەش جێگەی شەرمەزارییە بۆ عێراق کە لەگەڵ ڕژێمی ئەسەد دژ بە گەلەکەی وەستاوە و بە شێوەیەکی ترسناک بەشداری لە سەرکوتکردنی خەڵکەکەی کردووە".

 

ئاماژە بۆ ئەوەش دەکات "ڕەنگە لە هەفتە و مانگەکانی داهاتوودا زۆر وردەکاری لەو بارەیەوە ئاشکرا بکرێت لە دەرئەنجامی ئەو بەڵگەنامە و زانیارییانەی کە کەوتوونەتە دەستی ئۆپۆزیسیۆنی سووریا.