وەزیری دەرەوەی عێراق: دۆخی سووریا ئاڵۆزە و داعش دەستی بە خۆ ڕێکخستنەوە کردووە

ئاڤا نیوز

 

وەزیری دەرەوەی عێراق و سکرتێری گشتی نەتەوە یەکگرتووەکان تاوتوێی دۆخی سووریایان کرد و جەختیان لەسەر بەشداریی سەرجەم لایەنەکان لە حکومەتی نوێی سووریا کردەوە.

 

چیرۆکی سەرەکی: فوئاد حوسێن، جێگری سەرۆکوەزیران و وەزیری دەرەوەی عێراق لەگەڵ ئەنتۆنیۆ گۆتێریس، سکرتێری گشتی نەتەوە یەکگرتووەکان لە پەیوەندییەکی تەلەفۆنیدا تاوتوێی دۆخی سووریان کرد.

 

ڕاگەیێنراوی فەرمی: ئاژانسی فەرمی عێراق ڕایگەیاند: لە پەیوەندییە تەلەفۆنییەکەدا وەزیری دەرەوەی عێراق ڕایگەیاندووە کە دۆخی سووریا ئاڵۆزە و گرووپە چەکدارە جیاوازەکان چەندین ناوچەیان کۆنترۆڵکردووە. هاوکات داعش بە سوود وەرگرتن لەو ئاژاوەگێڕییەی کە لە ئەنجامی ڕووخانی سوپای سووریا و کشانەوەی هێزەکانی سووریای دیموکرات بۆ ڕۆژهەڵاتی ڕووباری فورات دروستبووە، دەستی بە خۆ ڕێکخستنەوەی ڕیزەکانی کردووەتەوە.

 

وەزیری دەرەوەی عێراق دەڵێت: پاراستنی ئەو زیندانانەی کە سەدان ئەندام و سەرکردەی داعشیان تێدایە، هاوکات دۆزینەوەی چارەسەرێکی خێرا بۆ کەمپی هۆل کە خێزان و ئەندامانی پێشووی ڕێکخراوەکەی تێیدایە بە پێویست و گرنگ زانی.

 

هاوکات، فوئاد حوسێن "بە پێویستی دەزانێت کە پارێزگاری لە کەمینە و پێکهاتەکانی سووریا بکرێت و بەشدارییان لە پڕۆسەی سیاسیدا مسۆگەر بکرێت و ناچار بە کۆچکردن نەکرێن".

 

لەلایەکی دیکە: گۆتێرێس گرنگی پێشکەشکردنی پاڵپشتی بۆ گەلی سووریا بە پێویست زانی و نیگەرانی خۆشی لە ئەگەری گرژییەکانی نێوان هەندێک ڕێکخراو و گرووپە چەکدارەکان و یەپەگە، لەگەڵ زیادبوونی ئەگەری سەرهەڵدانی ململانێ لە نێوانیاندا دەربڕی.