بەرپرسێکی بەرەی مقاوەمەی عێراق بۆ ئاڤا: خۆمان هەڵناوەشێنینەوە

ئاڤا نیوز

 

بزووتنەوەی ئەنساروالله، کە یەکێکە لە دیارترین گرووپە چەکدارەکانی عێراق ئاشکرایکرد، ڕێگە بەهیچ لایەنێک نادەن کار بۆ هەڵوەشاندنەوەی بەرەی "مقاوەمە ئیسلامی" لە عێراق بکات. 

لێدوانی تایبەت: عەلی فەتلاوی، سەرکردە لە بزووتنەوەی ئەنساروالله بە ئاڤای  ڕاگەیاند:  هێزەکانیان بەهیچ شێوەیەک ئامادەنین دەستبەرداری چەکەکانیان بن و لە هیچ هەڕەشەیەکی دەرەکی و ناوخۆیی ناترسن. 

 

زانیاریی زیاتر: فەتلاوی ئاماژەی بەوەکرد، گرووپە چەکدارەکان ئامادەن بۆ ڕووبەڕووبوونەوەی هەر هەڕەشەیەک بکرێتە سەریان لەلایەن هەر هێزێکی نێودەوڵەتییەوە بێت و هیچ لایەنێکی دەرەکیش ناتوانێت عێراق ناچار بکات ئەو گرووپانە هەڵبوەشێنێتەوە.

ئەو بەرپرسە هەڕەشەی ئەوەشی کرد، لە ئەگەری هەر دەستدرێژییەک بۆ سەر هێزەکانیان، وەڵامدانەوەی توندییان دەبێت.

قووڵتر: پەیوەست بە جموجۆڵەکانی نوێنەری تایبەتی نەتەوەیەگگرتوەکان لە عێراق سەبارەت بە مەترسی ئەو گرووپە چەکدارانە لەسەر داهاتووی عێراق،  سەرۆکی بزووتنەوەی ئەنسار الله بەئاڤای گوت، "پێویستە محەممەد ئەلحەسسان پابەند بێت بەو ئەرکەی لە چوارچێوەی یاسای نێودەوڵەتی پێی ڕاسپێردراوە و نەبێتە پۆستەچی بۆ گەیاندنی پەیامی هەندێک لایەن و وڵات بۆ سەرکردە عێراقییەکان".