دادگای فیدڕاڵی لەسەر دوو سکاڵای تایبەت بە هەرێمی کوردستان کۆدەبێتەوە

عێراق
2024-12-21

شەیری بکە لە:

دادگای فیدڕاڵی لەسەر دوو سکاڵای تایبەت بە هەرێمی کوردستان کۆدەبێتەوە

دانیشتنی دادگای فیدراڵی عێراق، وێنە: ina

ئاڤا نیوز

بەگوێرەی كارنامەی دانیشتنەكانی دادگای باڵای فیدڕاڵی عێراق، بڕیارە ڕۆژی دووشەممە دادگاکە تاوتوێی دوو سکاڵا بکات کە لەسەر دوو وەزارەتی هەرێمی کوردستان تۆمارکراون و داوای هەڵوەشاندنەوەیان کراوە.

چیرۆکی سەرەکی: سكاڵاكارێك بە ناوی 'خالید مستەفا حوسێن' لە دادگای باڵای فیدڕاڵی عێراق سكاڵای لەسەر سەرۆكی پەرلەمانی كوردستان تۆماركردووە، داوای هەڵوەشاندنەوەی هەردوو وەزارەتی شەهیدان و ئەنفالكراوان و وەزارەتی ئەوقاف و كاروباری ئاینیی كردووە و داوای كردووە ببنە دوو دەستەی سەر بە سەرۆكایەتی ئەنجوومەنی وەزیران، بە بیانووی نادەستووریبوونیان.

ڕاگەیێنراوی فەرمی: دادگای باڵای فیدراڵی عێراق، كارنامەی دانیشتنەكانی ئەم هەفتەیەی بڵاوكردووە و تێیدا؛ دوو سكاڵا لە كارنامەی ڕۆژی 23-12-2024 دانراون كە پەیوەستن بە هەڵوەشاندنەوەی وەزارەتی شەهیدان و ئەنفالكراوان پاڵپشت بە یاسای ژمارە 8ی ساڵی 2006، هەروەها وەزارەتی ئەوقاف و كاروباریی ئاینی، پاڵپشت بە یاسای ژمارە 11ی ساڵی 2007.

ئەوەی پێویستە بیزانیت: سكاڵاكار داوادەكات، هەریەك لە پەرلەمان و حكومەتی هەرێمی كوردستان پابەند بكرێن بە درووستكردنی دەستەیەك بە ناوی 'دامەزراوەی شەهیدان' كە بە ئەنجوومەنی وەزیرانی هەرێمی كوردستانەوە ببەسترێتەوە و لە ڕووی دارایی و ئیدارییەوە سەربەخۆ بێت. هەروەها سكاڵاكار لە سكاڵاكەیدا وەزارەتی ئەوقاف و كاروباریی ئاینیی هەرێمی كوردستانی بە وەزارەتێكی نادەستووریی هەژماركردووە، داوایكردووە هەریەك لە پەرلەمان و حكومەتی هەرێمی کوردستان پابەند بكرێن بە درووستكردنی دیوان بۆ ئاین و ئاینزا جیاوازەكان لە هەرێمی كوردستان، كە ڕاستەوخۆ سەر بە ئەنجوومەنی وەزیرانەوە بن و لە ڕووی دارایی و ئیدارییەوە سەربەخۆ بن.