داوا دەکرێت بارەگاکانی "بەرەی مقاوەمە" لە نزیک گەڕەکەکانی نیشتەجێبوون چۆڵ بکرێن

ئاڤا نیوز

 

ئەنجوومەنی پسپۆڕانی عێراق هۆشداری لە هێرشێکی ئەمریکا و ئیسرائیل بۆ سەر بارەگاکانی هێزە چەکدارەکانی "بەرەی مقاوەمەی ئیسلامی" لە عێراق دەدات و داوایان لێدەکات بارەگاکانیان لە گەڕەکەکانی نیشتەجێبوون چۆڵ بکەن.

 

داواكاری فه‌رمی: زیا موهەندیس سەرۆکی ئەنجوومەنی پسپۆڕانی عێراق، داوای لە هێزە چەکدارەکان کرد بارەگا و کۆگاکانی چەک و تەقەمەنی لە  نزیک گەڕەکەکانی نیشتەجێبوون چۆڵ بکەن، چونکە پێشبینی دەکرێت لەگەڵ دەستبەکاربوونی دۆناڵد ترەمپ وەک سەرۆکی ئەمریکا لە کۆشکی سپی ئەو هێرشە ئەنجام بدرێت.

 

به‌ته‌نیشت ئه‌م بابه‌ته‌وه‌: موهەندیس ئاماژەی بەوەشکرد، حکومەت ناتوانێت ڕووبەڕووی ئەو هێرشە ببێتەوە، بەڵام پێویستە لە ئێستاوە ئۆپەراسیونە هەواڵگرییەکانی چالاک بکات، بۆ ڕێگریکردن لەهەر پلانێکی نەخوازراو.

 

ئەمەش بزانە: ئەنجوومەنی شارەزایانی عێراق گرووپێکی کۆمەڵگەی مەدەنییە و کۆمەڵێک شارەزای عێراقی لە بواری شیکاری سیاسی و ئابووری لەخۆدەگرێت.