سەبارەت بە تۆمارە دەنگییەکەی ڕاوێژکارێکی سوودانی ڕوونکردنەوە دەدرێت

ئاڤا نیوز

 

دوای ئەوەی لە تۆڕە کۆمەڵایەتییەکان تۆمارێکی دەنگی ڕاوێژکارێکی سوودانی بڵاوبووە، فراکسیۆنەکەی سوودانی لەپەرلەمانی عێراق بە چەواشەکاری ناوی دەبات.

 

چیرۆكی سه‌ره‌کی: لە تۆڕە کۆمەڵایەتییەکان تۆمارێکی دەنگی فەریق سامی سوودانی، ڕاوێژکاری سەرۆکوەزیران لەلایەن پەرلەمانتار مستەفا سەنەدەوە بڵاوبووەتەوە، تێیدا باس لە هێنانی دەرمان لە بەندەری "ئوم قەسر" دەکات تەنانەت ئەگەر سەرپێچیشی تێدابێت بەرامبەر "خەشنات" ئەمەش بەزمانی شەقامی عێراقی بەواتای بڕە پارەیەکی زۆر دێت.

 

 لێدوانی فەرمی: ڕوقەیا نووری سەرۆکی فراکسیۆنی "ڕەوتی فورات" ـی سەر بە سەرۆکوەزیرانی عێراق ڕایگەیاند:  تۆمارە دەنگییەکەی سامی سوودانی لە چوارچێوەی ئەو هەڵمەتە میدیاییە دێت کە حکومەت و خودی سوودانی کردووەتە ئامانج.

 

سەرۆکی فراکسیۆنی ڕەوتی فورات ئاماژەی بەوەشکرد، بڵاوکردنەوەی ئەو تۆمارە دەنگییە، دوای سەردانەکەی ئەم دواییەی سوودانی بۆ شانشینی سعودییە و هەنگاوەکانی حکومەت بۆ چاکسازی و پێشکەشکردنی خزمەتگوزاری دێت.

 

ئەمەش بزانە: تاوەکو ئێستا حکومەتی عێراق بە پشتڕاستکردنەوە یان ڕەتکردنەوەی ئەو تۆمارە دەنگییە هیچی بەفەرمی ڕانەگەیاندووە.