ڕۆماننووسێکی کورد کۆچی دوایی کرد

ئاڤا نیوز

 

نووسەرێکی دیاری کورد لە ڕۆژهەڵاتی کوردستان کۆچی دوایی کرد و کۆمەڵێک کتێبی بەنرخی ئەدەبی لەدوای خۆی بەجێهێشت.

 

چیرۆکی سەرەکی: فەتاح ئەمیری، ڕۆماننووسی کورد لە تەمەنی 78 ساڵیدا لە شاری بۆکانی ڕۆژهەڵاتی کوردستان کۆچی دوایی کرد، بڕیاریشە ئەمڕۆ یەکشەممە لە گۆڕستانی گەورەی شارەکە بەخاک بسپێردرێت.

-فەتاح ئەمیری ساڵی 1946 لە گوندی مەنیچەری ناوچەی محاڵی ئاختاچی سەر بە شاری بۆکان لەدایکبووە، خوێندنی سەرەتایی لە مەهاباد تەواو کردووە.
 
زانیاریی زیاتر: فەتاح ئەمیری خاوەنی ڕۆمانی گێژەڵووکە-یە بە دوو بەرگ، ڕۆمانەکانی زیندەخەو و هاوارەبەرە-ی نووسیوە، هاوکات میرزا کە درێژەپێدەری ڕۆمانی هاوارەبەرە-یە.

 

ئەوەی پێویستە بیزانیت: بەھۆی چالاکیی سیاسییەوە ماوەی سێ ساڵ لە زینداندا بووە، ئەمیری شارەزایی تەواوی بەسەر زمانی کوردی و بنزاری موکریانی بە تایبەت هەبووە، بۆیە ڕۆمانەکانی بوونەتە سەرچاوەیەک بۆ زیندوویەتیی پەند، ئیدیۆم، دەستەواژە و وشەی ڕەسەنی کوردی.