ئاڤا کێشەی یەکسانکردنی بڕوانامەی فەرمانبەرانی پەروەردە چارەسەر دەکات

ئاڤا نیوز

 

ئەو فەرمانبەرانەی کێشەی یەکسانکردنی بڕوانامە و بەستنی دەرماڵەیان هەیە، داوای چارەسەرکردنی گرفتەکەیان دەکەن، وەزارەتی پەروەردەش لەوبارەیەوە دەڵێت: "بڕوانامەکانیان بۆ یەکسان دەکەین".

 

وێنە گەورەکە: لە ڕێگەی ئاڤاوە زیاتر لە 100 فەرمانبەری سەر بە وەزارەتی پەروەردە، کە چەند ساڵێکە خوێندنیان تەواو کردووە، کەچی نە دەرماڵەیان بۆ بەستراوە و نە بڕوانامەیان بۆ یەکسان کراوە، داوای چارەسەرکردنی گرفتەکانیان دەکەن.

 

لێدوانی فەرمی: محەمەد خز، یەکێکە لە فەرمانبەرەکانی سەر بە وەزارەتی پەروەردە کە ساڵی 2019 پەیمانگای ئینگلیزی لە ڕانیە تەواو کردووە، تاوەکو ئێستا بڕوانامەکەی بۆ یەکسان نەکراوە، بە ئاڤا میدیای ڕاگەیاند: سەرەتا بیانووی ئەوەیان هەبوو کە پارە نییە، بۆیە بڕوانامەمان بۆ یەکسان ناکەن، دواتر وتیان تەمەنتان بەسەرچووە، لە کاتێکدا 15 ساڵی دیکە ئێمە خانەنشین دەبین، بەسەرچوونی تەمەن واتای چییە؟

لەلایەکی دیکەوە: د. یوسف حەمەد مەولوود، بەڕێوەبەری فێرکردنی بنەڕەتی لە بەڕێوەبەرایەتیی گشتیی باخچەی منداڵان و فێرکردنی بنەڕەتی لە وەزارەتی پەروەردە بە ئاڤا میدیای ڕاگەیاند: "ئەگەر ئەو فەرمانبەرانەی خوێندنیان لە زانکۆ و پەیمانگاکان تەواو کردووە، خوێندنەکانیان پێچەوانەی دەوامی فەرمی خۆیان بووبێت، ئێمە تەعدیلی بڕوانامەیان بۆ دەکەین و دەیانکەین بە مامۆستا".

 

بەرپرسەکەی وەزارەتی پەروەردە داوا دەکات بە لیست ناو و زانیاریی بەش و زانکۆ و پەیمانگاکانیان بۆ بنێرن، بۆ ئەوەی بە مامۆستا دایان بنێن.