هەسەدە: لەگەڵ ئەنەکەسە ڕێککەوتین خێرا کێشەکانی نێوانمان چارەسەر بکەین

ئاڤا نیوز

 

فەرماندەیى گشتى هێزەکانى سووریاى دیموکرات 'هەسەدە' راگەیێنراوێکى لەبارەى کۆبوونەوەى ئەنەکەسە و مەزڵووم عەبدى، بڵاوکردەوە.

 

وێنە گەورەکە: لە دوای ڕووخانی دەسەڵاتی بەشار ئەسەد و پێکهێنانی حکومەتی نوێ لە دیمەشق، بۆ یەکەمجار کۆبوونەوەی نێوان مەزڵووم عەبدی، فەرماندەی گشتی هێزەكانی سووریای دیموكرات (هەسەدە) و سەرۆكایەتیی ئەنجوومەنی نیشتمانی كورد لە سووریا بەڕێوەچوو.

 

ڕاگەیێنراوى فەرمی: لە ڕاگەیێنراوەکەى هەسەدە ئاماژە بەوە کراوە "بە ئامادەبوونى بەرپرسانى هاوپەیمانیى نێودەوڵەتى کۆبوونەوەیەک لەنێوان مەزڵوم عەبدى، فەرماندەیى گشتىی هێزەکانى سووریاى دیموکرات و سەرۆکایەتیى ئەنجوومەنى نیشتمانیى کوردى سووریا 'ئەنەکەسە' ئەنجامدرا".

 

زانیاریی زیاتر: لە کۆبوونەوەکەدا گفتوگۆ لەبارەى هەڵوێستێکى یەکگرتووی کورد کراوە لە سووریاى نوێدا و هەردوولا ڕێککەوتن لەسەر بەردەوامیدان لەسەر ئەو جۆرە کۆبوونەوانە و خێرا لە چارەسەرکردنى کێشەکانى نێوانیان.

 

ئەوەی پێویستە بیزانیت: کۆبوونەوەکە لەسەر داوای مەزڵووم عەبدی بووە بۆ دەستپێکردنەوەی گفتوگۆی کوردی-کوردی لە سووریا و یەکخستنی هەڵوێستی کورد لە بەرامبەر پێشهاتەکانی قۆناغی نوێ لە سووریادا.

 

 ئەمەش بزانە: کۆبوونەوەی نێوان هەسەدە و ئەنەکەسە لە بنکەی سەربازیی ئەمریکا و بە سەرپەرشتیی بەرپرسانی هاوپەیمانیی نێودەوڵەتی بەرەنگاربوونەوەی داعش بەڕێوەچوو.