هێڵی ئاسمانیی عێراق جانتای ژمارەیەک گەشتیار لە مۆسکۆ لەبیر دەکات

ئاڤا نیوز

 

ژمارەیەک گەشتیاری هێڵی ئاسمانی عێراقی کە لە مۆسکۆوە بۆ بەغدا گەشتیانکردووە، لە فڕۆکەخانەی نیودەوڵەتی بەغدا توشی سەرسوڕمان دەبن کاتێک کە دەبینن جانتا و کەلوپەلەکانیان لەناو فڕۆکەکەدا نیە و دەزانن لە مۆسکۆ بەجێماون.

 

ئەوەی پێویستە بیزانیت: ئەوە یەکەمجار نییە هێڵی ئاسمانی عێراق لە گەشتەکانیدا ڕووبەڕووی ڕەخنە دەبێتەوە، مانگی ئابی ئەمساڵیش لەکاتی گواستنەوەی زیارەتکاران لە فڕۆکەخانەی نیودەوڵەتی بەغدا چەندین کێشە و سەرلێشێوان دروستبوو، دواتریش هێڵەکە ناچار بوو داوای لێبوردن لە گەشتیاران بکات.

 

زانیاریی بەدەستهاتووە: بەشێک لە گەشتیارەکان لە فڕۆکەخانەی نێودەوڵەتی بەغدا دیمەنی ساتی گەیشتنیان تۆمارکردووە و دەڵێن، گەشتەکەیان ڕۆژی 21ی ئەم مانگە بووە، بڕیاربوو کاتژمێر 1:00ی بەرەبەیان لە مۆسکۆوە بگەنە بەغدا، بەڵام کاتژمێر 4:20 خولەکی بەیانی گەیشتوون، واتە زیاتر لە سێ کاتژمێر دواکەوتوون.

 

ئەو گەشتیارانە ئاماژە بەوەش دەکەن، کاتێک دابەزیوون بەرەو شوێنی وەرگرتنەوەی جانتا و کەلوپەلەکانیان چوون، بۆیان دەرکەوتووە جانتای گەشتیارەکان لە مۆسکۆ بەجێماون و هێڵی ئاسمانی عێراق لەبیری چووە جانتاکانیان بخاتە ناو فڕۆکەکەوە، کاتێکیش گەیشتوون هیچ بەرپرسێک نەبووە تا سکاڵای خۆیانی لەلا بکەن.

 

لەلایەکی دیکەوە: لە وەڵامی گەشتیارەکاندا، بەرپرسێکی هێڵی ئاسمانی عێراق بە گەشتیارەکان دەڵێت، جانتاکانتان لە مۆسکۆ جێماوە و لەسەر ئەو کێشەیە وەزیر و بەرپرسانی دیکەی ئاگادارکردووەتەوە، جەختیش دەکاتەوە کە هەڵەکە لای ئەوان نەبووە، بەڵکو لەو فڕۆکەخانەیەی مۆسکۆ بووە کە گەشتەکەی بۆ بەغدا لێووە ئەنجامداوە.