حیزبوڵڵا شوێنێک بۆ بەخاکسپاردنی حەسەن نەسڕوڵڵا دەستنیشان دەکات

ئاڤا نیوز

 

دوای سێ مانگ لە کوشتنی حەسەن نەسڕوڵڵا، ئەمینداری گشتیی پێشووتری حیزبوڵڵای لوبنان، شوێنێک بۆ ناشتنی دیاری دەکرێت.

 

وێنە گەورەکە: لە دوای کوژرانی حەسەن نەسڕوڵڵا، حیزبوڵڵای لوبنان ڕایگەیاند، نەسڕوڵڵا بە شێوەیەکی کاتی و ئەمانەت لە شوێنێکی نادیاردا بە خاک سپێردراوە تا هەبوونی مەرجی گونجاو بۆ بەڕێوەبرنی ڕێوڕەسمی ناشتنی تەرمی لە شوێنێکی ئاشکرادا.

 

زانیاریی بەدەستهاتوو: سەرچاوەیەکی نزیک لە  حیزبوڵڵای لوبنان بۆ شەرقولئەوست ڕایگەیاند، شوێنێکی بۆ ناشتنی تەرمی حەسەن نەسروڵڵا ئەمینداری گشتیی پێشووی حیزبوڵڵا وڵاتەکەی دەستنیشانکردووە، لە پارچە زەوییەکە کە دەکەوێتە سەر ڕێگای فڕۆکەخانەی نێودەوڵەتیی ڕەفیق حەریری.

 

ئەمەش بزانە: حیزبوڵڵای لوبنان بە نیازە شوێنی ناشتنی حەسەن نەسڕوڵڵا بکاتە مەزارگە و هاوکات ڕێورەسمێک بۆ بە خاک سپاردنی هاشم سەفیەدین شوێنگرەوەی دادەنرێت.

 

باکگراوند: رۆژی 27-9-2024، لە ئەنجامی بۆردوومانێکی چڕی فرۆکە جەنگییەکانی ئیسرائیل بۆ سەر ناوچەکانی باشووری بەیرووتی پایتەخت و بەئامانجکردنی بارەگای سەرەکی حیزبوڵڵا لە لوبنان، شەش کەس کوژران و 90 کەسی  دیکەش برینداربوون، یەکێک لە کوژراوەکان حەسەن نەسروڵڵا بوو.