لە منبج شەڕ لە نێوان هەسەدە و سوپای نیشتمانی ڕوویدا

ئاڤا نیوز

 

هێزەکانی سووریای دیموکرات 'هەسەدە' لە باشووری ڕۆژهەڵاتی شاری منبج لە پارێزگای حەلەب هێرشیان کردە سەر گرووپە چەکدارەکانی 'سوپای نیشتمانیی سووریا' و چەند ناوچەیەکیان کۆنتڕۆڵکرد، دواتر لە هێرشێکی پێچەوانەدا گرووپە چەکدارەکان ئەو ناوچانەیان کۆنتڕۆڵکردەوە و بریندار و کوژراو هەیە.

 

وێنە گەورەکە: لەماوەی چەند کاتژمێرێکدا ڕووبەڕووبوونەوەی تووند لەنێوان هێزەکانی هەسەدە و گرووپە چەکدارەکانی ناسراو بە سوپای نیشتمانیی سووریا لە منبج ڕووی داوە و کوژراو و برینداری لێکەوتووەتەوە.

 

ڕاگەیێنراوی فەرمی: هەسەدە ڕایگەیاند، 'یەکەکانی ئەنجوومەنی سەربازیی منبج' پێشڕەوییان کردووە لە دەورووبەری بەنداوی تشرین و دەورووبەری ڕۆژهەڵاتی منبج و چەندین شوێنیان کۆنتڕۆڵ کردووە. هاوکات دەست گیراوە بەسەر چەک و ئۆتۆمبێلی سەربازیدا و چەند چەکدارێکی گرووپە چەکدارەکان کوژران. 

 

لەلایەکی دیکەوە: بەپێی سەرچاوە خۆجێییەکان، گرووپە چەکدارەکان هێرشی پێچەوانەیان کردووە و ئەو ناوچانەیان کۆنتڕۆڵ کردووەتەوە، سەرچاوەکانی نزیک لە هەسەدەش دەڵێن خۆیان پاشەکشێیان کردووە.

 

ئەوەی پێویستە بیزانیت: لە 10ی ئەم مانگە گرووپە چەکدارەکان 'سوپای نیشتمانیی سووریا' کۆنتڕۆڵکردنی تەواوی شاری منبجی ڕاگەیاند لە ئۆپەراسیۆنی "بەرەبەیانی ئازادی" کە ناوچەکانی ژێر دەسەڵاتی هەسەدە دەکاتە ئامانج.

 

ئەمەش بزانە: هەسەدە ڕۆژی سێشەممە ڕایگەیاند، لە بۆردومانەکانی تورکیا و ڕووبەڕووبوونەوە لەگەڵ گرووپە چەکدارەکانی سوپای نیشتمانی 16 چەکدار کوژراون لە منبج، حەلەب و دێرەزوور.