ئاڤا شێوازی بە قاچاغ هاوردەکردنی ماتۆرسکیل ئاشکرا دەکات

ئاڤا نیوز

ماتۆرسکیلی کواڵیتی خراپ و بێ مەرجی سەلامەتی لە بازاڕەکانی هەرێمی کوردستان ژمارەیان زیاد بووە، ئەمانەش ژیانی ماتۆرسوارەکان دەخەنە مەترسییەوە، ئاڤا بەدواداچوونی کردووە و شێوازی هاوردەکردنیان ئاشکرا دەکات.

چیرۆکی سەرەکی: لە هەرێمی کوردستان ماتۆرسکیل بە قاچاخ و پارچە پارچەکراوی هاوردەی هەرێمی کوردستان دەکرێن، ئەم جۆرە ماتۆڕانەش هیچ مەرجێکی سەلامەتییان تێدا نییە و وەزارەتی ناوخۆ قەدەغەی کردوون.

ئەوەی پێویستە بیزانیت: دوای هاوردەکردنی پارچەکان، لە کوردستان کۆدەکرێنەوە و دەبەسترێنەوە (تەجمیع دەکرێن)، ئەم جۆرە ماتۆڕانەش ڕەقەم ناکرێن. وەزارەتی ناوخۆ بڕیاری قەدەغەکردنی ئەو کارەی داوە و نووسراوی بۆ هەموو مەرزەکان کردووە، کە نابێت بەهیچ شێوەیەک ماتۆڕی پارچە بهێنرێتە کوردستان، بەڵام بەقاچاخ هەردێت.

لێدوانی فەرمی: هێمن میرانی، بەڕێوەبەری دیوانی وەزارەتی ناوخۆ بۆ ئاڤا دەڵێت: "نامانەوێت دەست ببەین بۆ قوتی خەڵک، چونکە خەڵک هەیە بژێوی ژیانی لەسەر ئەو ماتۆڕەیە، بەڵام دەمانەوێت سەرچاوەی هێنانەکەی وشک بکەین، چیتر ماتۆڕی خراپ نەهێنرێنە کوردستان و مناڵ و گەنجەکانمان ژیانیان سەلامەت بێت".