ئەنجوومەنی وەزیرانی عێراق کۆبووەوە؛ باسی مووچەی فەرمانبەرانی کوردستان نەکرا

ئاڤا نیوز 

 

ئەنجوومەنی وەزیرانی عێراق ئەمڕۆ سێشەممە کۆبوونەوەی ئاسایی خۆی ئەنجامدا و لەبارەی چەند پرسێک بڕیار و ڕاسپاردەی دەرکرد، بەڵام مووچەی فەرمانبەرانی هەرێمی کوردستان تەوەرێکی کۆبوونەوەکە نەبوو و هیچ بڕیارێکی لەبارەوە نەدراوە. 

 

ئەوەی پێویستە بیزانیت: تائێستا حکومەتی عێراق کۆی مووچەی مانگی 12 و تەواوکاری مووچەی مانگی 11 و بڕی 430 ملیار دیناری بۆ موچەی تەواوكاری مانگەكانی 10، 11 و 12 موچەخۆرانی هەرێمی كوردستان نەناردووە.

 

ڕاگەیێنراوی فەرمی: ئەنجوومەنی وەزیرانی عێراق لە کۆبوونەوەی ئەمڕۆ سێشەممەیدا کە بەسەرۆکایەتی محەممەد شیاع سوودانی سەرۆکوەزیران بەڕێوەچوو، تەوەرێکی تایبەت بوو بە ڕاپۆرتی دیوانی چاودێری دارایی فیدڕاڵ لەبارەی ڕووبەڕووبوونەوەی گەندەڵی و ئاستی وەزارەتەکان، لە کۆبوونەوەکەدا سوودانی داوای لە وەزارەتەکان کرد گرنگی بە ڕاسپاردەکانی دیوانی چاودێری دارایی بدەن و لێپرسینەوە لەوانە بکەن کە لە ڕووبەڕووبوونەوەی گەندەڵی و دۆسییەکانی گەندەڵیدا کەمتەرخەم بوون.

 

ئەنجوومەنی وەزیران بڕیاریشیدا لە ناوچەی نەهرەوان لە دەوروبەری بەغدا زەویی بۆ سەرباز و فەرمانبەرانی وەزارەتی بەرگریی تەرخان بکات و بەسەریاندا دابەش دەکرێت، هاوکات بڕیاردرا 11 بەڕێوەبەری گشتیش لە پۆستەکانییاندا جێگیر بکرێن، پڕۆژەیاسای زانکۆی عێراقیش بۆ زانستە ئەمنییەکان پەسەندکرا و بڕیاردرا ڕەوانەی پەرلەمان بکرێت.