حووسییەکان: بەرژەوەندییەکانی ئەمریکا  بە ئامانج دەگرین

ئاڤا نیوز 

 

حووسییەکانی یەمەن هۆشداری دەدەنە ئەمریکا، ئەگەر هێرشەکانیان بۆ سەر یەمەن بەردەوام بێت، ئەوانیش بەرژەوەندییەکانیان لە ناوچەکە دەکەنە ئامانج.

 

وێنە گەورەکە: حووسییەکانی یەمەن بەمەبەستی پشتگیریکردنی غەززە بەردەوام هێرش دەکەنە سەر کەشتییە بازرگانییەکانی ئیسرائیل و ئەمریکا و وڵاتانی دیکە لە دەریای سوور، ئەمریکا و ئیسرائیلیش بە هەڕەشەیەکی جیهانی پێناسەیان دەکەن.

 

لێدوانی فەرمی: محەمەد عەلی حووسی، ئەندامی ئەنجوومەنی سیاسیی حووسییەکان ڕایگەیاند: "ئەگەر دەستدرێژییەکانی سەر غەززە و یەمەن ڕانەوەستێنرێن، ئەوا لە بەرامبەردا ئامانجە گرنگەکانی ئەمریکا لە ناوچەکە دەکەینە ئامانج و تەنانەت چەکدارەکانمان لەوبارەیەوە ئاگادارکردووەتەوە".

 

ئەمەش بزانە: لە چەند ڕۆژی رابردوودا سەرۆکوەزیرانی ئیسرائیل و وەزیری بەرگریی ئیسرائیل ھەڕەشەیان کردبوو کە گورزی تووندتر لە حووسییەکان دەوەشێنن، ئەوەش لە وەڵامی ئەو مووشەکانەی کە لەلایەن حووسییەکانەوە ئاراستەی قووڵایی خاکی ئیسرائیل دەکرێن.