وەزیرانی ناوخۆی عێراق و تورکیا دۆسیەی ئاسایشی سنوورەکان تاوتوێ دەکەن

ئاڤا نیوز 

 

وەزیری ناوخۆی عێراق بەسەرۆکایەتی شاندێکی ئەمنیی لە ئەنقەرەیە و بڕیارە لە کۆبوونەوەیدا لەگەڵ هاوتا تورکییەکەی، دۆسیەی ڕووبەڕووبوونەوەی تاوانی ڕێكخراو و پاراستنی ئاسایشی سنوورە هاوبەشەکان تاوتوێ بکات.

 

ئەوەی پێویستە بیزانیت: لە پەیوەندییەکانی نێوان تورکیا و عێراق لەپاڵ پرسەکانی ئابووری و ئاڵوگۆڕی بازرگانی، دۆسیەکانی ئاو و ئاسایشی سنوور زۆرترین سەرنجیان لەسەرە، ئەنقەرە دەیەوێت لە ڕووبەڕووبوونەوەی پەکەکەدا بەغدا هاوکاری بکات و ڕێگە نەدات ڕێکخراوەکە خاکی عێراق بۆ هێرشکردنەسەر تورکیا بەکاربهێنێت.

 

ڕاگەیێنراوی فەرمی: باڵیۆزخانەی عێراق لە ئەنقەرە بڵاویکردەوە، لەسەر بانگهێشتی هاوتا تورکییەکەی، عەبدولئەمیر شەممەری وەزیری ناوخۆی عێراق بە سەردانێکی فەرمی لە ئەنقەرەیە و لەگەڵ بەرپرسانی ئەو وڵاتەدا دۆسییەکانی هەماهەنگی هاوبەش،  ڕووبەڕووبوونەوەی تاوانی ڕێكخراو، ئاڵوگۆڕی زانیاریی و ئەزموون، و ئاسایشی سنوورە هاوبەشەکان تاوتوێ دەکات.

 

ئەوەش بزانە: بڕیارە وەزیری ناوخۆی عێراق، یەشار گولەر وەزیری بەرگریی تورکیاش ببێنێت و هەردوولا باس لە هەماهەنگی ئەمنیی هاوبەش، بەدیهێنانی بەرژەوەندییە هاوبەشەکانی نێوان هەردوولا بکەن.