بازاڕێكی كاتی لەنێو بازاڕی هەولێر دەكرێتەوە

ئاڤا نیوز

 

لەنێو بازاڕی شاری هەولێر، بازاڕێكی كاتی كە پێكهاتووە لە چەندین كۆشكی فرۆشتن و نمایشی كەلوپەل و خۆراك دەكرێتەوە و تا دوای سەری ساڵی بەردەوام دەبێت.

 

زانیاریی بەدەستهاتوو: بازاڕە كاتییەكەی هەولێر لە شێوەی فێستیڤاڵێكە و لە 40 كۆشك و ستاندی كاسبار و كۆمپانیا نێوخۆییەكان پێكهاتووە كە خواردن و خواردنەوە و جلوبەرگ و کەلوپەلی دێرینی کوردەواری و بەرهەمەكانیان نماییش دەكەن.

 

لێدوانی فەرمی: ئیبراهیم عەبدولمەجید، وتەبێژی دەستەی گشتیی گەشتوگوزار بە ئاڤای گوت، "ئامادەسازییەکانمان لە سەرجەم پارێزگا و ئیدارە سەربەخۆکانی هەرێمی کوردستان چڕکردووەتەوە و پێشبینی دەکەین زیاتر لە 200 هەزار گەشتیار پشووەکانی سەری ساڵیان لە هەرێمی کوردستان بەسەر ببەن".

 

ئەوەی پێویستە بیزانیت: لە یەكەم شەوی كردنەوەی فێستیڤاڵەكەدا سەدان هاونیشتمانی و گەشتیار ئامادە بوون و چاوەڕوان دەكرێت شەوی سەری ساڵ بازاڕەكە ببێتە یەكێك لە قەرەباڵغترین شوێنەكانی شارەكە كە لە هەمان شوێن یارییە ئاگرینەكانیش نماییش دەكرێن.