عێراق بە فڕۆکەی ئێف 16 پێگەکانی داعش لە کەرکووک و سەڵاحەدین دەکاتە ئامانج

 ئاڤا نیوز 

 

فەرماندەیی ئۆپەراسیۆنە هاوبەشەکانی عێراق بەئامانجگرتنی ژمارەیەک مۆڵگەی چەکدارانی داعش لە سنووری پارێزگاکانی کەرکووک و سەڵاحەدین ڕادەگەیێنێت و دەڵێت، سەرجەم چەکدارەکان کوژراون.

 

وێنە گەورەکە: هەرچەندە داعش لە ساڵی 2017ـەوە کۆتاییهاتنی داعش وەکو ڕێکخراوێک ڕاگەیێنراوە، بەڵام شانە نوستووەکانی ڕێکخراوەکە ماون و هەندێکجار هێزە ئەمنییەکان و هاووڵاتیانی عێراق بەئامانج دەگرن.

 

ڕاگەیێنراوی فەرمی: فەرماندەیی ئۆپەراسیۆنە هاوبەشەکانی عێراق لە دوو ڕاگەیێنراوی جیادا ڕایگەیاند: لە ناوچەی وادی شای کە دەکەوێتە سنووری فەرماندەیی ئۆپەراسیۆنەکانی ڕۆژهەڵاتی سەڵاحەدین و زنجیرە چیای حەمرین کە دەکەوێتە سنووری فەرماندەیی ئۆپەراسیۆنەکانی کەرکووک، ژمارەیەک مۆڵگەی داعش بە فڕۆکەی ئێف 16 بۆردوومان کراون.

 

لە ڕاگەیێنراوەکە هاتووە، لە ئەنجامی بۆردوومانەکانیش هەموو ئەندامانی داعش کە لەناو مۆڵگەکاندا بوون کوژراون، فەرماندەیی ئۆپەراسیۆنە هاوبەشەکان جەختیش لە بەردەوامی ئۆپەراسیۆنەکان دژی داعش دەکاتەوە.