ئەمریکا هێزێک بە چەکی قورسەوە لە کۆبانێ جێگیر دەکات

ئاڤا نیوز

بارودۆخی ئەمدواییەی سووریا و هەڕەشەکانی گرووپە چەکدارەکانی نزیک لە تورکیا بۆ سەر شاری کۆبانێ، ئەمریکای ناچار کرد هێزێکی سەربازی لەو شارە جێگیر بکات.

وێنە گەورەکە: دوای زیادبوونی مەترسییەکان و هێرشی بەردەوامی گرووپە چەکدارەکانی نزیک لە تورکیا بۆ سەر کۆبانێ لەدوای ڕووخانی حکومەتی بەشار ئەسەد لە هەشتی ئەم مانگە، لەسەر داواکاریی هێزە کوردییەکان ئەمریکا هێزێکی سەربازی بە چەکی قورس و ئۆتۆمبێلی سەربازییەوە لە شارەکە جێگیر کردووە. 

لێدوانی فەرمی: ڕووکەن جەمال، وتەبێژی یەکینەکانی پاراستنی ژنان (یەپەژ) کە گرووپێکی سەر بە هەسەدەیە، بە ئاڤا نیوزی ڕاگەیاند:

٠ ئەمریکایان ئاگادار کردووەتەوە کە چیتر دەستەوەستان نابین لە بەرامبەر هێرش و پێشێلکارییەکانی گرووپە چەکدارەکان و خودی سەربازانی تورکیا.

٠ بە ئەمریکامان گوت ئەگەر ئێوە بە کردار لەبەرامبەر هێرشەکان هەڵوێست وەرنەگرن، ئەوا ئێمە وەڵاممان دەبێت.

٠ لە سەردەمی داعش کۆبانێمان تەسلیم نەکرد، ئێستا چۆن بۆ ئەم گرووپانەی چۆڵ دەکەین.

٠ دوای ئەم پەیامەی ئێمە، ئەمریکا ڕاستەوخۆ هێزێکی خۆی هێنایە کۆبانێ. 

باکگراوند: هەفتەی ڕابردوو پات ڕایدەر، گوتەبێژی وەزارەتی بەرگریی ئەمریکا  (پێنتاگۆن) ڕایگەیاند، دوای ڕووخانی حکومەتی بەشار ئەسەد ژمارەی سەربازەکانیان لە سووریا زیاد کردوون، پێشتر 900 سەربازیان هەبووە و ئێستا ژمارەکە بۆ زیاتر لە دوو هەزار سەرباز زیاد کراوە.