دادگای کارگێڕی عێراق دوو سکاڵای تایبەت بە کەرکووک ڕەتدەکاتەوە

ئاڤا نیوز

 

دادگای كارگێڕی عێراق دوو سکاڵای پارتی و ئەندامێکی پێکهاتەی عەرەبی لە ئەنجوومەنی پارێزگای کەرکووک دژی ڕێکارەکانی پێکهێنانی حکومەتی خۆجێی پارێزگاکە ڕەتکردەوە، دوو سکاڵای بەرەی تورکمانیی و ڕاکان جبووریشی بۆ مانگی داهاتوو دواخست.

 

ئەوەی پێویستە بیزانیت: زیاتر لە چوار مانگە حەوت ئەندامی ئەنجوومەنی پارێزگای کەرکووک لە فراکسیۆنەکانی پارتی، تورکمان و پێکهاتەی عەرەبی دژی شێوازی پێکهێنانی حکومەتی خۆجێی پارێزگاکەیان بەشداری دانیشتنەکانی ئەنجوومەنەکە ناکەن، لە دادگاش سکاڵایان تۆمارکردووە و باوەڕیان وایە حکومەتی کەرکووک یاسایی نییە.

 

ڕاگەیێنراوی فەرمی: ڕۆژی 24ی ئەم مانگە دادگای كارگێڕی عێراق سکاڵای هەریەکە لە فراکسیۆنی پارتی و سەلوا مەفرەجی، ئەندامی هاوپەیمانی عەرەبی لە ئەنجوومەنی پارێزگای کەرکووکی ڕەتکردەوە و ڕایگەیاند، دادگا بۆی ڕوون نییە کە ڕێوشوێنەكانی پێکهێنانی حکومەتی خۆجێی کەرکووک هیچ سەرپێچییەكی یاسایی تیادابووبێت.

 

جیاواز لە سکاڵاکەی پارتی کە لەسەر محەممەد حافز سەرۆکی ئەنجوومەنی پارێزگای کەرکووک تۆماریکردبوو، سەلوا مەفرەجی سکاڵاکەی لەسەر لەتیف ڕەشید، سەرۆککۆماری عێراق تۆمارکردبوو چونکە مەرسومی کۆماری بۆ دەستبەکاربوونی ڕێبوار تەها، پارێزگاری کەرکووک دەرکردووە.

 

لەلایەکی دیکەوە: لەسەر هەمان بابەت دادگای كارگێڕی عێراق دوو سکاڵای بەرەی تورکمانی عێراق و ڕاکان جبووری، سەرۆکی بەتەمەن لە یەکەم دانیشتنی ئەنجوومەنی پارێزگای کەرکووکی بۆ 22ی مانگی داهاتوو دواخست.