سەرۆکی دەزگای هەواڵگری گشتیی سووریا دیاریکرا

ئاڤا نیوز

 

حکومەتی نوێی سووریا بەردەوامە لە پڕکردنەوەی پۆستە وزارییەکانی و پێکهێنانی کابینەی نوێ، لەدوای دیارکردنی وەزیری دەرەوەی سووریا ئێستا حکومەتی ئەو وڵاتە سەرۆکی دەزگای هەواڵگری گشتیی دیارکردووە.

 

وێنە گەورەکە: تەحریرولشام بە هاوبەشی لەگەڵ تورکیا ئەندامانی کابینەی نوێی حکومەتەکەی دیاریدەکات. دەسەڵاتدارانی تورکیا جەخت لەوە دەکەنەوە پێویستە بە زووترین کات ئیدارەی نوێی سووریا پێکبهێنرێت، پێشبینی دەکرێت زۆربەی وەزیرەکان لە ئەندام و هاوکارانی ئەحمەد شەرع و تەحریرولشام بن.

 

زانیاریی بەدەستهاتوو: ئەنەس حەتاب، ناسراو بە ئەبو ئەحمەد حدود وەک بەرپرسی دەزگای هەواڵگری گشتی سووریا دیاریکرا، حەتاب مێژوویەکی دوور و درێژی لەگەڵ ئەحمەد شەرع، بەرپرسی ئیدارەی نوێی بەڕێوەبردنی سووریا هەیە.

 

زانیاریی زیاتر: حەتاب کە ناسراوە بە ئەبو ئەحمەد حدود، تەمەنی 37 ساڵە و شوێنی لەدایکبوونی جەیرودە، لە باکووری ڕۆژهەڵاتی دیمەشق، حەتاب دۆستێکی کۆنی ئەحمەد شەرعە، لە زۆربەی قۆناغەکاندا بەیەکەوە کاریان کردووە.

 

باکگراوند: حەتاب لە ساڵی 2013  یەکێک لە پاسەوانەکانی ئەحمەد شەرع بوو و لە ساڵی 2014 ئەمریکا ناوی لە لیستی سزاکانی تۆمارکرد، حەتاب هاوکاری سەرەکی شەرع بووە لە هەموو چالاکییەکانیدا، هاوکات سەرکردایەتیی چەندین ئۆپراسیۆنی کردووە لە دژی داعش و قاعیدە لە ئیدلب.