ئیسرائیل ئیدارەی نوێی سووریا بە 'مافیا' ناودەبات

ئاڤا نیوز

 

ئیسرائیل ترس و نیگەرانی بەرامبەر بە گۆڕانکاریی و پێشهاتەکانی سووریا بۆ دروستبووە، سەرەڕای پێشوازی حکومەتی وڵاتان بۆ ئیدارەی نوێی ئەو وڵاتە و سیاسەتەکانی، ئیسرائیل هێرش دەکاتە سەر ئیدارە نوێیەکە و بە 'مافیای تیرۆریستان' ناوزەندی دەکات.  

 

وێنە گەورەکە: لەدوای کەوتنی دەسەڵاتی بەشار ئەسەد لە 8ی دیسەمبەرەوە، دەستەی تەحریرولشام حکومەتێکی نوێی پێکهێناوە، وڵاتانی جیهان و ناوچەکە گەڕی سەردانی دیبلۆماسیان بۆ ئەو وڵاتە دەستپێکردووە دەیانەوێت پەیوەندیی لەگەڵ ئیدارەی نوێی ئەو وڵاتە دروستبکەن، بەڵام لە بەرامبەردا ئیسرائیل نیگەرانە لەو دۆخەی هاتووەتە ئاراوە. 

 

ڕاگەیێنراوی فەرمی: جەدعۆن ساعر، وەزیری دەرەوەی ئیسرائیل دەربارەی ئیدارەی نوێی سووریا دەڵێت: مافیای تیرۆریست لە ئیدلب بوو و ئێستاش کۆنتڕۆڵی دیمەشقی کردووە.

 

زانیاریی زیاتر: دوای کۆنتڕۆڵ کردنی دیمەشق و ڕووخانی دەسەڵاتی بەشار ئەسەد لەلایەن چەکدارانی ئۆپۆزیسیۆنەوە، سوپای ئیسرائیل لە خاڵە سنوورییەکانی لەگەڵ سووریا پێشڕەویی کرد و چەندین شار و ناوچەی شارۆچکەی کۆنتڕۆڵ کرد و بە چڕی دەیان شوێنی مووشەکباران کرد لەوانەش دیمەشقی پایتەخت.