هێڵی ئاسمانی عێراقی پارەی زیادە لە خاوەن پێداویستییەکی تایبەت وەردەگرێت

ئاڤا نیوز

 

هێڵی ئاسمانی عێراقی چەندین جار ڕووبەڕووی ڕەخنەی توندی گەشتیاران بووەتەوە بەهۆی هەڵە و کەمتەرخەمییەوە و لە تازەترین کاری ئەو هێڵە ئەوەبووە کە پارەی زیادەی لە خاوەن پێداویستییەکی تایبەت وەرگرتووە. 

 

وێنە گەورەکە: هێڵی ئاسمانی عێراقی گەورەترین هێڵی ئاسمانی عێراقە، خاوەنی 43 فڕۆکەیە، لە چوارچێوەی وەزارەتی گواستنەوە کارەکانی دەکات و گەشتەکانی بۆ ناوخۆ و دەرەوەیە، زۆرجار بەهۆی هەڵە و گرفتی تەکنیکییەوە بووەتە بابەتی گەرمی سۆشیاڵ میدیا. 

 

چیرۆکی سەرەکی: هاووڵاتییەکی خاوەن پێداویستی تایبەت بە فڕۆکەیەکی هێڵی ئاسمانی عێراق گەشتیکردووە بۆ هەولێر و کورسی تایبەتی خاوەن پێداویستییە تایبەتەکانی بەکارهێناوە کە خزمەتگوزارییەکی تایبەت و بەخۆڕاییە بە ڕەچاوکردنی دۆخی تایبەتی ئەو کەسانە. بەڵام ئەو فڕۆکە پێش ئەوەی لە بەغداوە بفڕێت وەسڵێکی پاردانی 81 هەزار بۆ ئەو کەسە کردووە و هەر لەوێ پارەکەی لێ وەرگیراوە.

 

زانیاریی زیاتر: دوای ئەوەی بابەتەکە لە تۆڕە کۆمەڵایەتییەکان بڵاودەبێتەوە و کاردانەوە بەدوای خۆیدا دەهێنێت، هێڵی ئاسمانی عێراقی بڕیار دەدات بە داشکانی نرخی تکت بۆ خاوەن پێداویستییەکان.