دەم پارتی و ئۆجەلان لە ئیمرالی کۆدەبنەوە

ئاڤا نیوز

 

کەمێک لەمەوبەر هەریەک لە سری سورەیا ئۆندەر، جێگری سەرۆکی پەرلەمانی تورکیا و پەروین بوڵدان پەرلەمانتارانی دەم پارتی سەردانی گرتووخانەی ئیمرالییان کرد و  ئێستا لەگەڵ عەبدوڵڵا ئۆجەلان، ڕێبەری زیندانیکراوی پەکەکە لە کۆبوونەوەدان، ئەمەش دوای ئەوەی وەزارەتی دادی تورکیا ڕێگەپێدانی بۆ چاوپێکەوتنی نێوان بەرپرسانی دەم پارتی و ئۆجەلان دەرکرد.

 

وێنە گەورەکە: لەماوەی ڕابردوودا دەوڵەت باخچەلی، سەرۆکی جەهەپە لە پەرلەمانی تورکیا داوای کرد سەرکردەکانی دەم پارتی و ئۆجەلان یەک ببینن، بۆ ئەوەی ڕای ئۆجەلان بزانرێت لەسەر پرسی ئاشتی لە تورکیا و داوکارییەکەی باخچەلی بە " ئازادکردنی ئۆجەلان لە بەرامبەر ئەوەی ئۆجەلان بێتە پەرلەمان و هەڵوەشاندنەوەی پەکەکە ڕابگەیێنێت". 

 

لێدوانی فەرمی: عومەر فاروق گارگەرلیئۆغلو، پەرلەمانتاری دەم پارتی بە ئاڤا میدیای ڕاگەیاند: ئەمە هەنگاوێکی گرنگە بۆ پڕۆسەی ئاشتەوایی نێوان تورک و کورد، ئەنجامی کۆبوونەوەکە کاریگەری لەسەر دۆخی باکووری کوردستان و ڕۆژئاوای کوردستان دەبێت، ئێمە هیوامان بەوە هەیە کە ئەنجامی کۆبوونەوەکە باش دەبێت.

 

گارگەرلیئۆغلو، پەرلەمانتاری دەم پارتی گووتیشی: ئۆجەلان سەرکردەیەکی کاریگەری پەکەکەیە، بڕیارەکانی ئەو کاریگەریەکی گەورە لەسەر پڕۆسەکە دروست دەکات، هەوڵەکان بۆ پرۆسەی ئاشتی لە تورکیا بەردەوام دەبێت، هەوڵەکان لەلایەن دەسەڵاتەوە هیوا بەخشن.

 

لەلایەکی دیکەوە: حەسەن ئۆزگونوش، پەرلەمانتاری پێشووی دەم پارتی و سیاسەتمەداری تورکیا دەڵێت: حکومەتی تورکیا دەزانێت پرسی کورد بە جیهانی بووە و ئیتر بووە بە پرسی ئەمریکا و فەرەنسا و ئیسرائیل و ڕۆژهەڵاتی ناوەڕاست، بۆیە بەم هەنگاوە وای نیشان دەدات کە سوورە لەسەر چارەسەری پرسی کورد. 

 

قووڵتر: ماوەکانی ڕابردوو، عومەر ئۆجەڵان، برازای عەبدوڵڵا ئۆجەلان دوای نزیکەی سێ ساڵ لە قەدەغەی چاوپێکەوتن سەردانی ئۆجەلانی کرد، دوای کۆبوونەوەکە لەسەر بڕیاری وەزارەتی دادی تورکیا جارێکی دیکە بڕیاری قەدەغەی چاوپێکەوتن بۆ ئۆجەلان دەرچوو، بەڵام دواتر لەسەر داوای باخچەلی لە 26-11-2024 سەرکردەکانی دەم پارتی، سەردانی وەزارەتی دادی تورکیایان کرد بۆ ئەوەی ڕێگەیان پێبدرێت چاویان بە عەبدوڵڵا ئۆجەڵان، ڕێبەری زیندانیکراوی پەکەکە بکەوێت. لە 27-12 وەزارەتی داد ڕێگەیدا بەرپرسانی دەم پارتی چاویان بە ئۆجەلان بکەوێت.

 

ئەوەی پێشبینی دەکرێت: چاوەڕێ دەکرێت ئەو شاندەی وەڵامی ئۆجەلان بۆ پێشنیازەکەی باخچەلی و پرسی ئاشتەوایی کورد بێننەوە، ئەمەش کاریگەری لەسەر دۆخی کورد لە باکووری کوردستان و ڕۆژئاوای کوردستان دەبێت.