بۆئەوەی هاوسەرەکەی دەستگیر نەکرێت، ئەندامێکی جەستەی بە بنکەی پۆلیس دەفرۆشێت

ئاڤا نیوز

 

لە پارێزگایەکی عێراق، کەسێک  ئەندامێکی جەستەی خۆی وەک بەرتیل بە بنکەیەکی پۆلیس فرۆشتووە تاوەکو هاوسەرەکەی دەستگیر نەکرێت،  وەزیری ناوخۆش فەرمانی لێکۆڵینەوەی دەرکردووە.

 

چیرۆكی سه‌ره‌كی: لەتۆڕە کۆمەڵایەتییەکان بڵاوبووەتەوە، دوای ئەوەی لەدۆسیەیەکدا، فەرمانی دەستگیرکردن بۆ هاوسەرەکەی دەردەچێت، کەسێک گورچیلەیەکی خۆی بە بنکەیەکی پۆلیس دەفرۆشێت وەک بەرتیل تاوەکو ئەو فەرمانە جێبەجێ نەکەن و پشتگوێی بخەن.

 

ڕاگه‌یێنراوی فه‌رمی: وەزارەتی ناوخۆی عێراق لە بەیاننامەیەکدا ڕایگەیاند: عەبدولئەمیر شەممەری، وەزیری ناوخۆی عێراق بڕیاری پێکهێنانی لیژنەیەکی توندی بۆ لێکۆڵینەوە لەم کەیسە ترسناکە دەرکردووە  و داوای ڕێکاری یاسایی توندیشی بەرامبەر تێوەگڵاوان کردووە.

 

شەممەری جەختی لەوە کردووەتەوە، "پێویستە دەرئەنجامی لێکۆڵینەوەکان بخرێتە بەردەم ڕای گشتی و لێپرسینەوە لە سەرجەم ئەو کەسانە بکرێت کە تێوەگڵاون لەم کەیسە و بەسزای خۆیان بگەن، بەڵام تا ئەوکاتە دەبێت زانیارییەکان بەنهێنی بمێنێتەوە".