وەزارەتی ناوخۆی عێراق ئاماری تاوان و چالاكییە جۆراوجۆرەكانی 2024 بڵاودەكاتەوە

ئاڤا نیوز

 

وەزارەتی ناوخۆی حكومەتی فیدڕاڵی عێراق، گرنگترین ئامارەكانی ساڵی 2024ـی بڵاوكردەوە و ڕایدەگەیەنێت ئەمساڵ ڕێژەی تاوانی تیرۆرستی 83% كەمیكردووە.

 

لێدوانی فەرمی: میقداد میری، وتەبێژی وەزارەتی ناوخۆ، لە كۆنفرانسێكی ڕۆژنامەوانیدا ئامارەكانی وەزارەتەكەی بۆ دەزگاكانی ڕاگەیاندن خستەڕوو لە سەرەتاشدا ئاماژەی بەوەدا وەزارەتی ناوخۆ دوو فڕۆكەی بۆ چالاكیە مەدەنیەكان كڕیوە و لەگەڵ كۆمپانیایەكی كۆریش گەیشتووەتە ڕێككەوتن بۆ هاوردەكردنی دوو فڕۆكەی ئاگركوژێنەوە.

- ڕێژەی تاوان لە عێراق لە ساڵی 2024 بەراورد بە ساڵی ڕابردوو بە ڕێژەی 18% كەمیكردووە.

- تاوانە گەورەكانی هاوشێوەی كوشتن و دزی و ڕفاندنیش بەڕێژەی 20% كەمیكردووە كە 96%ی تاوانەكان لەلایەن پیاوان ئەنجامدراون و 4%ـیش ئافرەتان.  

-عێراق پێشكەوتنێكی بەرچاوی لە بەرەنگاربوونەوەی تاوانە داراییەكان بەدەستهێناوە و لەباشترین ئەو وڵاتانەیە كە ڕێگری لە تاوانی بازرگانیكردن بە مرۆڤ كردووە و لە پلەی یەكەمی جیهاندایە.

- تاوانەكانی بازرگانیكردن و بەكارهێنانی ماددەی هۆشبەر بە گەورەترین ئاڵەنگاری بۆ عێراق وەسف كردووە و دەڵێت: بەدرێژایی ئەمساڵ 662 تۆڕی بازرگانیكردن بە ماددەی هۆشبەر دەستگیركراون كە 57 تۆڕیان نێودەوڵەتی بوون. ڕوونیشی كردەوە ڕێژەی دادگاییكردنی تاوانبارانی ماددەی هۆشبەر بەڕێژەی 242% بەرزبووەتەوە، 148 سزای لەسێدارەدان بۆ تاوانبارانی بازرگانیكردن بە ماددەی هۆشبەر دەرچووە لەگەڵ 578 سزای زیندانی هەتاهەتایی.

- وەزارەتی ناوخۆی عێراق ئاشكرای دەكات بەدرێژایی ئەمساڵ، 13 هەزار و 842 تۆمەتبار بە تاوانی ماددەی هۆشبەر دەستگیركراون و 8 هەزار و 400ـیان سزا دراون.

- هەزار و 267 چەك دەستی بەسەردا گیراوە. 

وتەبێژی وەزارەتی ناوخۆ ئاماژە بەوەش دەکات، "لەئاكامی ڕووبەڕووبوونەوەی باندەكانی ماددەی هۆشبەر سێ ئەندامی هێزە ئەمنییەكان كوژراون و 31 ئەندامی دیكەش برینداركراون.  هاوکات لە ساڵی 2024، 360 هەزار و 588 تۆمەتبار بە تاوانی جۆراوجۆر لە سەرجەم پارێزگاكان دەستگیركراون.