عێراق: هەر کەسێک لە شەوی سەری ساڵدا تەقە بکات سزا دەدرێت

ئاڤا نیوز

 

وەزارەتی ناوخۆی عێراق، باس لە سزادانی ئەو کەسانە دەکات کە لە ئاهەنگەکانی سەری ساڵدا تەقە دەکەن و دەبنە هۆی دروستکردنی ئاژاوە. 

 

وێنە گەورەکە: ساڵانە بەمەبەستی پێشوازیکردن لە ساڵی نوێ چەندین چالاکی جۆراوجۆر لە مۆڵ و شوێنە گشتییەکانی عێراق ڕێکدەخرێت و خەڵکێکی زۆر ڕوو لەو شوێنانە دەکەن، بۆ دابیکردنی سەلامەتی و ئاسایشیش وەزارەتی ناوخۆ چەندین ڕێککاری ئەمنی بۆ شەوی سەری ساڵ جێبەجێ دەکات. 

 

لێدوانی ڕۆژنامەوانی: میقداد میری، وتەبێژی وەزارەتی ناوخۆی عێراق، لە كۆنفرانسێكی ڕۆژنامەوانیدا ڕایگەیاند:

 

-  پلانێکی تۆکمە بۆ سەرجەم کەرتەکان ئامادە کراوە، هێزێکی زۆری ئاسایش و پۆلیس لە شەوی سەری ساڵ بڵاوەی پێدەکرێت، لێپرسینەوەی تووند بەرامبەر هەر کەسێک دەکەین کە پێشێلی ڕەوشتی گشتیی بکات، هاوکات ئاسایشی سەرجەم چالاکییەکان و شوێنەکانی ئاهەنگگێڕان دابین دەکەین.

 

-  ڕێگری لە تەقەکردن دەکەین و لێپرسینەوە لەگەڵ تەقەکەرانیش دەکەین.

 

بڵاوکراوەی فەرمی: بەڕێوەبەرایەتیی بەرگریی شارستانی ڕایگەیاند، پلانێکی گشتگیریان بۆ پاراستنی هاوولاتییان و موڵکیان لەمەترسییەکانی خراپ بەکارهێنانی یاریە ئاگرینەکان و ئاگرکەوتنەوەکان بەتایبەتی لەناوچە نیشتەجێبووەکان و بازاڕە بازرگانییەکاندا داڕشتووە.

 

لێدوانی فەرمی: لیوا موحسین کازم، بەڕێوەبەری گشتیی بەرگریی شارستانی ڕاگەیاند، ئەو پلانەی بۆ ئاهەنگەکانی سەری ساڵ دانراوە، هەموو بەڕێوەبەرایەتییەکانی بەرگریی شارستانی لە پارێزگاکان دەگرێتەوە.

 

- بەپێی پلانەکە ڕێوشوێنەکان لەگەڵ نزیکبوونەوە لە کاتژمێر 12ی شەو دەگاتە لووتکە و تیمەکانی بەرگری شارستانی لە شەقام و ناوچەکانی نیشتەجێبوون بڵاوەیان پێدەکرێت بۆ دڵنیابوون لە سەلامەتی هەمووان.